ຝຶກອົບຮົມສ້າງຄວາມເຂັ້ມແຂງວຽກງານແຜນການ-ຮ່ວມມື ໃຫ້ພະແນກ ປທສ 08 ແຂວງ

13/03/2019

ຝຶກອົບຮົມສ້າງຄວາມເຂັ້ມແຂງວຽກງານແຜນການ-ຮ່ວມມື ໃຫ້ພະແນກ ປທສ 08 ແຂວງ

 

     ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ເປີດຊຸດຝຶກອົບຮົມສ້າງຄວາມເຂັ້ມແຂງວຽກງານແຜນການ-ຮ່ວມມື ໃຫ້ກັບບັນດາພະນັກງານພະແນກ ປທສ 08 ແຂວງ (ແຂວງໄຊສົມບູນ, ແຂວງບໍລິຄຳໄຊ, ແຂວງຄຳມ່ວນ, ແຂວງສະຫວັນນະເຂດ, ແຂວງຈຳປາສັກ, ແຂວງສາລະວັນ, ແຂວງເຊກອງ ແລະ ແຂວງອັດຕະປື) ໃນລະຫວ່າງວັນທີ 28 ກຸມພາ-01 ມີນາ ຜ່ານມານີ້,   ທີ່ພະແນກ ປທສ ເເຂວງບໍລິຄຳໄຊ. ໂດຍການເປັນປະທານຮ່ວມຂອງ ທ່ານ ເສົານະຄອນ ເພັດວິຫານ ຮອງຫົວໜ້າກົມແຜນການ ແລະ ການຮ່ວມມື ແລະ ທ່ານ ລັງສີ ແກ້ວວິເສດ ຫົວໜ້າພະແນກ ປທສ ແຂວງບໍລິຄຳໄຊ, ມີນັກສໍາມະນາກອນ, ຄະນະພະແນກ, ຫົວໜ້າຂະແໜງ ພ້ອມດ້ວຍພະນັກງານວິຊາການທີ່ຮັບຜິດຊອບວຽກແຜນການຈາກພະແນກ ປທສ 08 ແຂວງເຂົ້າຮ່ວມ.

       ໃນການຈັດຝຶກອົບຮົມໃນຄັ້ງນີ້ ກໍ່ເພື່ອຍົກລະດັບຄວາມຮູ້ຄວາມສາມາດໃຫ້ຜູ້ເຂົ້າຝຶກໄດ້ຮັບຮູ້ ແລະ ເຂົ້າໃຈກ່ຽວກັບວຽກງານແຜນການ-ຮ່ວມມື, ແນະນຳກ່ຽວກັບວິທີການກຳນົດວິໄສທັດ, ຍຸດທະສາດ, ແຜນການ, ແຜນງານ, ໂຄງການ ແລະ ເຜີຍແຜ່ເອກະສານຕ່າງໆທີ່ຕິດພັນກັບວຽກງານຮ່ວມມືໃນຂອບຂອງອາຊຽນ, ອະນຸພາກພື້ນ, ຂອບຂອງສອງຝ່າຍ ແລະ ການຮ່ວມມືກັບອົງການຈັດຕັ້ງສາກົນ.

        ທ່ານ ເສົານະຄອນ ເພັດວິຫານ ໄດ້ກ່າວວ່າ: ວຽກງານແຜນການ-ຮ່ວມມື ເປັນວຽກງານທີ່ສຳຄັນ ແລະ ຈຳເປັນຕ້ອງໄດ້ຍົກລະດັບຄວາມຮູ້, ຄວາມສາມາດໃຫ້ແກ່ພະນັກງານ ໃຫ້ມີຄວາມເຂົ້າໃຈໃນການສ້າງແຜນ,  ການຜັນຂະຫຍາຍແຜນການມາເປັນແຜນງານໂຄງການລະອຽດ ໃນການຈັດຕັ້ງປະຕິບັດເພື່ອໃຫ້ບັນລຸຕາມຈຸດປະ ສົງ ແລະ ລະດັບຄາດໝາຍທີ່ກຳນົດໄວ້ໃນແຜນພັດທະນາ 5 ປີ ຄັ້ງທີ II ຂອງຂະແໜງການ, ສຳລັບວຽກງານຮ່ວມມືກໍ່ມີຄວາມສຳຄັນຫຼາຍ ແລະ ຈຳເປັນຕ້ອງໄດ້ມີຄວາມຮັບຮູ້ເຂົ້າໃຈຢ່າງເລີກເຊີ່ງ ແລະ ກ້ວາງຂວາງໂດຍສະເພາະໃນຂອບການຮ່ວມມືຕ່າງໆແນ່ໃສ່ການຍາດແຍ່ງເອົາການຊ່ວຍເຫຼືອເຂົ້າໃນການພັດທະນາຂະແໜງການຂອງຕົນ ບົນພຶ້ນຖານຫຼັກການ ແລະ ລະບຽບທີ່ວາງອອກ. ນອກນີ້, ທ່ານຍັງໄດ້ເນັ້ນໜັກໃຫ້ບັນດານັກສຳມະນາກອນຕິດຕາມການນຳສະເໜີບົດ ດ້ວຍຄວາມເອົາໃຈໃສ່ ແລະ ນຳເອົາບົດຮຽນໄປສືບຕໍ່ຜັນຂະຫຍາຍໃນການຈັດຕັ້ງປະຕິບັດໃນໜ້າວຽກທີ່ຕົນເອງຮັບຜິດຊອບໃຫ້ມີປະສິດທິຜົນສູງຂຶ້ນ ເພື່ອໃຫ້ບັນລຸເປົ້າໝາຍທີ່ກຳນົດໄວ້ໃນແຜນພັດທະນາປະຈຳປີກໍ່ຄືແຜນພັດທະນາ 5 ປີຂອງຂະແໜງການ ປທສ.

   ໂດຍ: ກົມແຜນການ ແລະ ການຮ່ວມມື

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ