ຄະນະຜູ້ແທນ ກະຊວງ ປທສ ເຂົ້້າຮ່ວມ ກອງປະຊຸມສໍາມະນາອາຊຽນ 5G

25/03/2019

ຄະນະຜູ້ແທນ ກະຊວງ ປທສ ເຂົ້້າຮ່ວມ ກອງປະຊຸມສໍາມະນາອາຊຽນ 5G

           ໂດຍການຕອບສະຫນອງການເຊື້ອເຊີນຂອງ ທ່ານ ຫວຽນ ແມ່ງຮຸ່ງ ລັດຖະມົນຕີ ກະຊວງ ຖະແຫລງຂ່າວ ແລະ ການສື່ສານ ແຫ່ງ ສສ. ຫວຽດນາມ. ທ່ານ​ ບຸນສະເຫລີມໄຊ ເຄນນາວົງ ຮອງ​ລັດ​ຖະ​ມົນ​ຕີ ກະ​ຊວງ​ໄປ​ສະ​ນີ, ໂທ​ລະ​ຄົມ​ມ​ະ​ນາ​ຄົມ ແລະ ການ​ສື່​ສານ (ປທສ) ແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງໄປເຂົ້້າຮ່ວມກອງ​ປະ​ຊຸມສໍາມະນາອາຊຽນ 5G  (ASEAN Conference on 5G) ທີ່ຮາໂນ້ຍ, ສສ ຫວຽດນາມ ລະຫວ່າງວັນທີ 21-22 ມີນາ 2019 ນີ້.

          ເປັນການສືບເນື່ອງມາຈາກ ກອງປະຊຸມລັດຖະມົນຕີອາຊຽນໄອຊີທີ ແລະ ໂທລະຄົມມະນາຄົມ ຄັ້ງທີ 18 (TELMIN18) ທີ່ປະເທດອິນໂດເນເຊຍ ໄດ້ຍົກເອົາຫົວຂໍ້: ການເຊື່ອມໂຍງ ແລະ ການບໍລິການເຄື່ອນທີ່                (connectivity & mobility) ເປັນຫົວຂໍ້ ທີ່ສໍາຄັນໃນການຮ່ວມມື ທົ່ວພາກພື້ນອາຊຽນ ລວມເຖິງການວາງແຜນກະກຽມຄວາມພ້ອມໃນການຫັນສູ່ ຍຸກການສື່ສານ 5G. ດັ່ງນັ້ນ, ໃນກອງປະຊຸມ ຈຶ່ງໄດ້ປຶກສາຫາລືກັນ ເຖິງແນວທາງນະໂຍບາຍ ການຈັດສັນຄື້ນຄວາມຖີ່, ບັນດານິຕິກໍາໃນການນໍາໃຊ້ຄຶ້ນຄວາມຖີ່ 3 ຢ່ານ ( <1GHz, 1-6GHz, ແລະ >6GHz) ເພື່ອໃຫ້ຮອງຮັບເອົາເຕັກໂນໂລຊີ 5G.  ນອກນີ້, ຍັງມີງານສໍາມະນາ ຊຶ່ງເປັນ​ເວ​ທີທີ່ສໍາຄັນໃນການສົນ​ທະ​ນາ​ ແລກ​ປ່ຽນວິ​ໄສ​ທັດ, ການວາງແຜນ​​ໃນ​ການ​ນຳ​ໃຊ້ເຕັກ​ໂນ​ໂລ​ຊີ 5G ໂດຍສະເພາະ ຄຸນນະສົມບັດທາງດ້ານຄວາມໄວຂອງການຮັບສົ່ງສັນຍານ, ການຄອບຄຸມ, ຄວາມສາມາດໃນການເຊື່ອມຕໍ່ບັນດາອຸປະກອນ IoT ຂະໜາດໃຫ່ຍ ແລະ ການສະໜັບສະໜູນ ອຸດສະຫະກໍາ 4.0 ລວມທັງ ການນໍາໃຊ້ປະໂຫຍດຈາກເຕັກໂນໂລຊີດັ່ງກ່າວ ເຂົ້າໃນການພັດທະນາ ເສດຖະກິດ ແລະ ສັງຄົມ. ໂດຍມີຊ່ຽວຊານຈາກຄູ່ຮ່ວມເຈລະຈາ ເປັນຕົ້ນ: ຢີ່ປຸ່ນ, ສ,ເກົາຫຼີ, ໄອທີຢູ ແລະ ຊ່ຽວຊານຈາກ Huawei, Qualcom , GSMA, Ericsson, Nokia, ZTE ​ມາບັນຍາຍກ່ຽວກັບ ການກະກຽມດ້ານໂຄງລ່າງພື້ນຖານ, ຄວາມປອດໄພ, ການນໍາໃຊ້ຄື້ນຄວາມຖີ່ ເພື່ອປະໂຫຍດສູງສຸດສໍາລັບພາກລັດ ແລະ ພາກເອກະຊົນ ໃນການພັດທະນາ 5G.

          ໃນໂອກາດດຽວກັນ, ທ່ານ ຮອງ ລັດຖະມົນຕີ ພ້ອມດ້ວຍຄະນະ ຍັງໄດ້ໄປຢ້ຽມຢາມສູນຄວາມປອດໄພທາງ ໄຊເບີ ( security operation center) ແລະ ຢ້ຽມຢາມ ສູນຜະລິດອຸປະກອນການສື່ສານ ຂອງຫວຽດນາມ.  

          ຂ່າວ: ກົມແຜນການ ແລະ ການຮ່ວມມື, ປທສ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ