ວາລະສານໄອຊີທີ
ຈໍານວນຜູ້ເຂົ້າຊົມເວັບໄຊ
  • ມື້ນີ້ 660
  • ມື້ວານ1,139
  • ອາທິດນີ້5,197
  • ອາທິດກ່ອນ8,573
  • ເດືອນນີ້24,886
  • ເດືອນກ່ອນ29,097
  • ທັງໝົດ168,548
Weather, 28 November
Vientiane Weather
+14

High: +27° Low: +14°

Humidity: 87%

Wind: ENE - 16 KPH

Luang Prabang Weather
+24

High: +24° Low: +21°

Humidity: 94%

Wind: WSW - 3 KPH

Savannakhet Weather
+26

High: +26° Low: +25°

Humidity: 96%

Wind: SSW - 14 KPH

Pakxe Weather
+19

High: +19° Low: +19°

Humidity: 95%

Wind: NE - 3 KPH

ກອງປະຊຸມລັດຖະມົນຕີອາຊຽນ ດ້ານຄວາມປອດໄພທາງໄຊເບີ 2016.

ໃນວັນທີ 11 ຕຸລາ 2016 ຜ່ານມານີ້ ທ່ານ ປອ ທັນສະໄໝ ກົມມະສິດ, ລັດຖະມົນຕີ ກະຊວງ ໄປສະນີ, ໂທ ລະຄົມມະນາຄົມ ແລະ ການສື່ສານ (ກະຊວງ ປທສ) ໄດ້ເຂົ້າຮ່ວມກອງປະຊຸມລັດຖະມົນຕີອາຊຽນ ດ້ານຄວາມປອດໄພທາງໄຊເບີ 2016 (Asean Ministerial Conference on Cyber Security 2016), ທີ່ຈັດຂຶ້ນຢູ່ ປະເທດສິງກະໂປ ພາຍໃຕ້ການເປັນປະທານຂອງ ທ່ານ ດຣ Yaacob Ibrahim, ລັດຖະມົນຕີກະຊວງ ຂໍ້ມູນຂ່າວສານ ແລະ ການສື່ສານ, ຜູ້ຮັບຜິດຊອບວຽກງານດ້ານຄວາມປອດໄພທາງໄຊເບີ ຂອງສິງກະໂປ, ໂດຍມີລັດຖະມົນຕີ ແລະ ຄະນະວິຊາການ ດ້ານຄວາມປອດໄພທາງໄຊເບີທີ່ກ່ຽວຂ້ອງ ຂອງບັນດາປະເທດສະມາຊິກອາຊຽນເຂົ້າຮ່ວມ. ຈຸດປະສົງຂອງກອງປະຊຸມດັ່ງກ່າວ ແມ່ນເພື່ອເສີມສ້າງການຮ່ວມມືກັນໃນກອບຂອງອາຊຽນ ດ້ານວຽກງານການປ້ອງກັນຄວາມປອດໄພທາງໄຊເບີ ແລະ ກໍ່ໄດ້ມີການປຶກສາຫາລືກ່ຽວກັບສິ່ງທີ່ສາມາດເຮັດຮ່ວມກັນໄດ້ ເພື່ອກ້າວໄປເຖິງການສ້າງຂີດຄວາມສາມາດ, ສ້າງຄວາມເຂັ້ມແຂງດ້ານການປ້ອງກັນໄພທາງໄຊເບີໃນເຂດພາກພື້ນ ແລະ ໃນອາຊຽນ ພາຍໃຕ້ຄໍາຂວັນທີ່ວ່າ: “ສ້າງຄວາມປອດໄພດິຈິຕອນໃນອານາຄົດໃຫ້ມີຄວາມເຊື່ອຖື” ໂດຍໃຫ້ມີການຮ່ວມໄມ້ຮ່ວມມືກັນ.

ກອງປະຊຸມໃນຄັ້ງນີ້ ຜູ້ເຂົ້າຮ່ວມຍັງໄດ້ປຶກສາຫາລືວຽກງານທີ່ສໍາຄັນເຊັ່ນ: ທິດທາງໃນຕໍ່ໜ້າສໍາລັບອາຊຽນ ໃນການສ້າງແຜນຍຸດທະສາດ, ແຜນນະໂຍບາຍ ແລະ ການຮ່ວມມືກັນ ດ້ານຄວາມປອດໄພທາງໄຊເບີ. ເຊິ່ງໄດ້ມີການນໍາສະເໜີ ເຖິງໄພຄຸກຄາມຕໍ່ພື້ນຖານໂຄງລ່າງເສດຖະກິດ-ສັງຄົມຂອງບັນດາປະເທດໃນອາຊຽນ, ເຫັນໄດ້ຈາກປະຈຸບັນຢູ່ໃນອາຊຽນ ກໍ່ໄດ້ມີການນໍາໃຊ້ໄອຊີທີ, ລະບົບຄອມພິວເຕີ ແລະ ອິນເຕີເນັດ ເຂົ້າໃນການຂັບເຄື່ອນການພັດທະນາເສດຖະກິດ-ສັງຄົມຢ່າງກວ້າງຂວາງ, ແຕ່ໃນທາງກັບກັນການກໍ່ອາຊະຍາກໍາ, ການເຈາະລະບົບຄອມພິວເຕີ, ການທໍາລາຍຂໍ້ມູນຂ່າວສານ ຍັງຄົງເປັນໄພຂົ່ມຂູ່, ເປັນສິ່ງທ້າທາຍທີ່ທາງພັກ-ລັດ ແລະ ເອກະຊົນ ກໍ່ຄືຂະແໜງການຕ່າງໆ ຢູ່ໃນບັນດາປະເທດອາຊຽນຕ້ອງໄດ້ມີແຜນການ ແລະ ວິທີການແກ້ໄຂຮ່ວມກັນ, ການທໍາຄວາມເຂົ້າໃຈ, ການເຫັນໄດ້ເຖິງຄວາມສໍາຄັນຕໍ່ກັບການນໍາໃຊ້ກົນໄກຕ່າງໆ ລວມໄປເຖິງການສ້າງແຜນຍຸດທະສາດ ແລະ ການສ້າງແຜນນະໂຍບາຍປ້ອງກັນໄພທາງໄຊເບີທີ່ຮັດກຸມ ພ້ອມທັງເປິດຊ່ອງທາງດ້ານວຽກງານການຮ່ວມມືໃຫ້ສາມາດເຊື່ອມໂຍງກັນໄດ້ໃນການວາງແຜນປ້ອງກັນຄວາມປອດໄພທາງໄຊເບີຢູ່ໃນປະເທດອາຊຽນ.

ຜ່ານການດໍາເນີນກອງປະຊຸມກໍ່ສາມາດເຫັນໄດ້ວຽກງານການສ້າງແຜນຍຸດທະສາດ ແລະ ການຮ່ວມມືກັນປ້ອງກັນຄວາມປອດໄພທາງໄຊເບີເປັນວຽກງານໃໝ່ ຊຶ່ງການຈັດຕັ້ງທາງພາກລັດ ແລະ ເອກະຊົນຍັັງບໍ່ມີຄວາມເຂົ້າໃຈຢ່າງເລິກເຊິ່ງ ແລະ ກວ້າງຂວາງ, ຊຶ່ງການເປີດກວ້າງປະຊຸມສົນທະນາດັ່ງກ່າວ ແມ່ນເປັນອີກວິທີໜຶ່ງທີ່ຊ່ວຍໃຫ້ຫຼາຍພາກສ່ວນໄດ້ຮັບຮູ້ ແລະ ເຂົ້າໃຈມີສ່ວນຮ່ວມໃນການອອກຄໍາຄິດເຫັນ, ຕັ້ງຄໍາຖາມ ແລະ ແກ້ໄຂບັນຫາໃຫ້ທັນຕາມຍຸກສະໄໝເທັກໂນໂລຊີຂໍ້ມູນ-ຂ່າວສານ ແລະ ອີກດ້ານໜຶ່ງກໍ່ເພື່ອເປັນການພັກດັນໃຫ້ການສ້າງແຜນຍຸດທະສາດ ດ້ານຄວາມປອດໄພທາງໄຊເບີໃນກອບການຮ່ວມມືຂອງອາຊຽນໃຫ້ເກີດປະໂຫຍດສູງ ແລະ ຈະກ້າວໄປຂ້າງໜ້າຮ່ວມກັນໄດ້ ເພື່ອແນ່ໃສ່ຫຼຸດຜ່ອນຄວາມເສຍຫາຍ ແລະ ຫຼຸດຜ່ອນການລົງທຶນ.

ໃນໂອກາດດັງກ່າວ ທ່ານ ປອ ທັນສະໄໝ ກົມມະສິດ ລັດຖະມົນຕີກະຊວງ ປທສ ກໍ່ໄດ້ຮັບກຽດປະກອບຄໍາຄິດເຫັນຕໍ່ກອງປະຊຸມສົນທະນາໃນຄັ້ງນີ້ ໂດຍມີເນື້ອໃນວ່າ: ກະຊວງ ປທສ ຂອງພວກເຮົາເຫັນດີຕໍ່ວິໃສທັດ ແລະ ຕໍ່ແຜນແມ່ບົດການພັດທະນາດ້ານວຽກງານໄອຊີທີ ຂອງອາຊຽນແຕ່ນີ້ຮອດປີ 2020 (ASEAN ICT master plan 2020) ຊຶ່ງໄດ້ຮັບຮອງເອົາຢູ່ໃນກອງປະຊຸມລັດຖະມົນຕີ ໂທລະຄົມມະນາຄົມ (Telmin meeting) ຢູ່ທີ່ດານັງ ປະເທດ ສສ.ຫວຽດນາມ ໃນປີ 2015 ທີ່ຜ່ານມາ. ຊຶ່ງທ່ານໄດ້ຍົກໃຫ້ເຫັນຄວາມສໍາຄັນ ແລະ ຄວາມຈໍາເປັນໃນການປ້ອງກັນຄວາມປອດໄພທາງໄຊເບີ ການປະສານຮ່ວມມືກັນໃນກອບຂອງອາຊຽນ ໂດຍໃຫ້ມີການກໍານົດກອບການຮ່ວມມືໃນການສ້າງແຜນຍຸດທະສາດ ແລະ ມີກົນໄກຮ່ວມມືທາງໄຊເບີທີ່ອາຊຽນເຫັນດີ ແລະ ເປັນເອກະພາບກັນ. ອີກດ້ານໜຶ່ງ ກໍ່ຕ້ອງໄດ້ເປີດຊ່ອງທາງໃຫ້ສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີ (Computer Emergency Response Team) ຂອງບັນດາປະເທດອາຊຽນໄດ້ມີບ່ອນອີງໃນການແລກປ່ຽນບົດຮຽນ, ການຮ່ວມມືກັນແກ້ໄຂເຫດສຸກເສີນຮ່ວມກັນ, ການຝຶກຊ້ອມຮັບມືຕົວຈິງກັບເຫດສຸກເສີນທາງຄອມພິວເຕີ ແລະ ການຊ່ວຍເຫຼືອເພື່ອຍົກລະດັບຄວາມຮູ້ທາງດ້ານວິຊາການ.

ໃນຕອນທ້າຍກອງປະຊຸມ ທາງປະເທດເຈົ້າພາບສິງກະໂປ ກໍ່ໄດ້ສະຫຼຸບຕີລາຄາສູງຕໍ່ການເຂົ້າຮ່ວມຂອງບັນດາລັດຖະມົນຕີອາຊຽນ ທີ່ເຫັນໄດ້ເຖິງຄວາມໝາຍ ແລະ ຄວາມສໍາຄັນຕໍ່ການຈັດກອງປະຊຸມສົນທະນາປຶກສາຫາລື ໃນດ້ານວຽກງານຄວາມປອດໄພທາງໄຊເບີກອບຂອງອາຊຽນ ແລະ ທາງລັດຖະບານສິງກະໂປ ກໍ່ໄດ້ນໍາສະເໜີງົບປະມານ 10 ລ້ານໂດລາ ສິງກະໂປ ເພື່ອນໍາໃຊ້ເຂົ້າໃນວຽກງານການສ້າງຂີດຄວາມສາມາດ ແລະ ການພັດທະນາຊັບພະຍາກອນມະນຸດທາງດ້ານການປ້ອງກັນຄວາມປອດໄພທາງໄຊເບີຂອງປະເທດອາຊຽນໃຫ້ມີຄວາມພ້ອມທາງດ້ານປະລິມານ ແລະ ຄຸນນະ ພາບ.