ວາລະສານໄອຊີທີ
ຈໍານວນຜູ້ເຂົ້າຊົມເວັບໄຊ
  • ມື້ນີ້ 98
  • ມື້ວານ756
  • ອາທິດນີ້14,824
  • ອາທິດກ່ອນ10,612
  • ເດືອນນີ້8,530
  • ເດືອນກ່ອນ26,786
  • ທັງໝົດ693,343
Weather, 28 November
Vientiane Weather
+14

High: +27° Low: +14°

Humidity: 87%

Wind: ENE - 16 KPH

Luang Prabang Weather
+24

High: +24° Low: +21°

Humidity: 94%

Wind: WSW - 3 KPH

Savannakhet Weather
+26

High: +26° Low: +25°

Humidity: 96%

Wind: SSW - 14 KPH

Pakxe Weather
+19

High: +19° Low: +19°

Humidity: 95%

Wind: NE - 3 KPH

ປທສ ເປີດສູນພັດທະນາ ແລະ ຝຶກອົບຮົມ ຊອບແວ ລາວ-ອິນເດຍ

ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດພິທີເປີດສູນພັດທະນາ ແລະ ຝຶກອົບຮົມ ລາວ-ອິນເດຍ ຂຶ້ນໃນວັນທີ 26 ພະຈິກ ຜ່ານມານີ້, ທີ່ສະຖາບັນເຕັກໂນໂລຊີການສື່ສານ ຂໍ້ມູນຂ່າວສານ (ສຕສ) ຊຶ່ງສູນດັ່ງກ່າວແມ່ນໄດ້ຮັບການຮ່ວມມືກັນລະຫວ່າງ ກະຊວງ ປທສ ແລະ ສູນ C-DAC ແຫ່ງປະເທດອິນເດຍ. ເປັນກຽດເຂົ້າຮ່ວມໂດຍ ທ່ານ ປອ ທັນສະໄໝ ກົມມະສິດ ລັດຖະມົນຕີກະຊວງ ປທສ, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ແລະ ທ່ານ ຣາວີ ຊານກາ ອາຍໂຊລາ (Ravi Shankar Aisola) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງປະເທດ ອິນເດຍ ປະຈໍາ ສປປ ລາວ ພ້ອມດ້ວຍຕາງໜ້າຈາກກະຊວງ ການຕ່າງປະເທດ, ກະຊວງ ແຜນການ ແລະ ການລົງທຶນ, ພະນັກງານອ້ອມຂ້າງກະຊວງ ແລະ ແຂກທີ່ຖືກເຊີນ. ພິທີເປີດສູນນີ້ ເປັນນິມິດໝາຍອັນດີ ໃຫ້ແກ່ການຮ່ວມມືຂອງສອງປະເທດ ພ້ອມນີ້, ຍັງເປັນໄລຍະເວລາດຽວກັນກັບກອງປະຊຸມຄະນະກໍາມາທິການຮ່ວມ ວ່າດ້ວຍ ການຮ່ວມມືສອງຝ່າຍ ສປປ ລາວ-ສາທາລະນະລັດອິນເດຍ ຄັ້ງທີ 9 ທີ່ກະຊວງການຕ່າງປະເທດ ໃນວັນທີ 23 ພະຈິກທີ່ຜ່ານມາ.

ທ່ານ ປອ ທັນສະໄໝ ກົມມະສິດ ໄດ້ກ່າວວ່າ: ການຮ່ວມມືກັນຂອງສອງຝ່າຍລາວ-ອິນເດຍ ໃນການປະຕິບັດໂຄງການ ທີ່ເປັນການຮ່ວມມືກັນຂອງທັງສອງຝ່າຍ ທາງດ້ານບຸກຄະລາກອນ ແລະ ງົບປະມານ ໃນການປັບປຸງ ສ່ວນໜຶ່ງຂອງຫ້ອງຮຽນໃນສະຖາບັນ ໃຫ້ກາຍມາເປັນສູນພັດທະນາ ແລະ ຝຶກອົບຮົມ ຊອບແວ ທີ່ສາມາດເປັນຕົ້ນແບບທີ່ດີໃຫ້ແກ່ການຮ່ວມມືອຶ່ນໆໃນອານາຄົດ. ຊຶ່ງມີເປົ້າໝາຍໃນການສ້າງ ແລະ ພັດທະນາບຸກຄະລາກອນ ທີ່ມີຄວາມສາມາດໃນການພັດທະນາຊອບແວລະດັບສູງ ສາມາດຕອບສະໜອງຄວາມຕ້ອງການຕົວຈິງ ປະກອບສ່ວນເຂົ້າໃນວຽກງານພັດທະນາເສດຖະກິດ-ສັງຄົມ ຢ່າງຮອບດ້ານໄປຕາມຍຸກສະໄໝທີ່ມີຄວາມຮຽກຮ້ອງຕ້ອງການສູງ.

ສູນພັດທະນາ ແລະ ຝຶກອົບຮົມ ຊອບແວ ລາວ-ອິນເດຍນີ້, ແມ່ນໜຶ່ງໃນແຜນການຮ່ວມມື ລະຫວ່າງ ລາວ ແລະ ປະເທດອິນເດຍ ທີ່ໄດ້ລົງນາມ ການຕົກລົງ ໃນລະຫວ່າງວັນທີ 10 ສິງຫາ 2015 ລະຫວ່າງ ກະຊວງ ປທສ ແລະ ສູນ C-DAC ແລ້ວກໍ່ໄດ້ເລີ່ມຕົ້ນລົງມືກໍ່ສ້າງໃນປີ 2017 ໂດຍກະຊວງ ປທສ ໄດ້ກະກຽມ ແລະ ປັບປຸງ ບັນດາຫ້ອງຕ່າງໆ ໃຫ້ໄດ້ຕາມການອອກແບບຂອງປະເທດອິນເດຍ ພ້ອມດ້ວຍປະກອບພະນັກງານ ເຂົ້າເຮັດວຽກຮ່ວມກັນໃນການຕິດຕັ້ງບັນດາເຄື່ອງອຸປະກອນ ຊຶ່ງໃນຕົ້ນເດືອນສິງຫາ ຜ່ານມານີ້ ຝ່າຍອິນເດຍກໍ່ໄດ້ສົ່ງເຄື່ອງອຸປະກອນມາຕິດຕັ້ງ ແລະ ຕົ້ນເດືອນກັນຍາກໍ່ໄດ້ສົ່ງຊ່ຽວຊານມາຕິດຕັ້ງອຸປະກອນ, ສໍາເລັດການຕິດຕັ້ງທັງໝົດໃນວັນທີ 25 ຕຸລາ ທີ່ຜ່ານມານີ້ ໂດຍມີຫ້ອງ ແລະ ອຸປະກອນປະກອບດ້ວຍ: ຫ້ອງແລັບສໍາລັບຝຶກອົບຮົມ 2 ຫ້ອງ (ຄອມພິວເຕີ 60 ໜ່ວຍ), ຫ້ອງຮຽນບັນຍາຍ 1 ຫ້ອງ, ຫ້ອງບໍລິຫານ 4 ຫ້ອງ, ຫ້ອງປະຊຸມ 1 ຫ້ອງ, ຫ້ອງສະໝຸດ 1 ຫ້ອງ ແລະ ຫ້ອງເຊີບເວີ 1 ຫ້ອງ ຈຸດປະສົງຫຼັກເພື່ອພັດທະນາ ແລະ ສ້າງຄວາມເຂັ້ມແຂງຂອງບຸກຄະລາກອນ ດ້ານຊອບແວລະດັບສູງ ໃນຂອບການຮ່ວມມືກວມເອົາຂົງເຂດດັ່ງນີ້: (1) ການສ້າງສູນພັດທະນາ ແລະ ຝຶກອົບຮົມຊອບແວ, (2)ການສ້າງບຸກຄະລາກອນ ແລະ ຄູຝຶກປະຈໍາສູນ ຢູ່ປະເທດອິນເດຍ 10 ທຶນ ແລະ ສົ່ງຊ່ຽວຊານມາປະຈໍາຢູ່ລາວ 6 ເດືອນໃນໄລຍະເລີ່ມເປີດສູນ, (3)ການຊ່ວຍເຫຼືອລ້າ ສະໜອງບັນດາອຸປະກອນໃສ່ຫ້ອງຮຽນ ແລະ ຫ້ອງທົດລອງຂອງສູນ, (4)ເພີ່ມທະວີທັກສະໃນການສິດສອນ ແລະ ສ້າງແຜນການຮຽນ-ການສອນພາຍໃນສູນ, (5)ການຮ່ວມມືອຶ່ນໆ ທີ່ທັງສອງຝ່າຍ ຕົກລົງເຫັນດີເປັນເອກະພາບກັນ ໃຫ້ມີຜົນປະໂຫຍດໃນຂະແໜງການ ໄອຊີທີ ໃຫ້ເກີດປະໂຫຍດສູງສຸດ

ຂ່າວ: ສຕສ, ປທສ.

ກວດແກ້: ຫ້ອງການ, ພະແນກປະຊາສໍາພັນ.