ວັນທີ 30 ພະຈິກ 2023, ກະຊວງເຕັກໂນໂລຊີ ແລະ ການສື່ສານ(ກຕສ) ໄດ້ມອບອຸປະກອນ ແລະ ລະບົບການຮຽນການສອນດິຈິຕອນ (Digital Learning Classroom: G-Room) ໃຫ້ແກ່ໂຮງຮຽນມັດທະຍົມສົມບູນ ໂພນທອງ, ເມືອງ ນາຊາຍທອງ, ນະຄອນຫຼວງວຽງຈັນ ຊຶ່ງໄດ້ຮັບການສະໜັບສະໜູນຈາກ ອົງການສະຫະປະຊາຊາດ ເພື່ອການພັດທະນາ(UNDP) ປະຈໍາ ສປປ ລາວ ພາຍໃຕ້ໂຄງການຕົວແບບ (Pilot Project) ໃນນັ້ນ, ແມ່ນໂຄງການສ້າງຫ້ອງຮຽນດິຈິຕອນ.

ໂອກາດດັ່ງກ່າວ, ທ່ານ ປອ. ທະວີສັກ ມະໂນທັມ, ຫົວໜ້າສູນບໍລິຫານລັດດິຈິຕອນ ໄດ້ກ່າວວ່າ: ຈຸດປະສົງໂຄງການ ຫ້ອງຮຽນດິຈິຕອນ (Digital Learning Classroom) ນີ້ ແມ່ນໜຶ່ງໃນໜ້າວຽກທີ່ສໍາຄັນ ຖືເປັນໂຄງການຕົ້ນແບບ ໃນການສົ່ງເສີມການຮຽນ-ການສອນ ອອນລາຍທາງໄກ ເພື່ອອໍານວຍຄວາມສະດວກ ແລະ ສ້າງເງື່ອນໄຂ ພ້ອມທັງເພີ່ມປະສິດທິພາບ ໃຫ້ແກ່ບັນດາໂຮງຮຽນ ໃນການສິດສອນ ຖ່າຍທອດຄວາມຮູ້ໃຫ້ແກ່ນັກຮຽນ ໂດຍນໍາໃຊ້ອຸປະກອນ ເຄື່ອງມືເຕັກໂນໂລຊີທີ່ທັນສະໄໝ ພ້ອມທັງເປັນການເພີ່ມທັກສະທາງດ້ານດິຈິຕອນໃຫ້ຄູ-ອາຈານ ແລະ ນັກຮຽນ ໃຫ້ສາມາດນໍາໃຊ້ລະບົບການຮຽນການສອນແບບດິຈິຕອນ ແລະ ອຸປະກອນທັນສະໄໝ ເຂົ້າໃນການຮຽນ-ການສອນຕົວຈິງ. ນອກຈາກນີ້, ທາງສູນບໍລິຫານລັດດິຈິຕອນ ແລະ ອົງການສະຫະປະຊາຊາດ ປະຈໍາ ສປປ ລາວ ຍັງຈະໄດ້ສືບຕໍ່ ການມອບ-ຮັບ ອຸປະກອນການຮຽນອອນລາຍດັ່ງກ່າວນີ້ອີກຕື່ມ 4 ໂຮງຮຽນຕົວແບບ ຄື: ແຂວງວຽງຈັນ 1 ໂຮງຮຽນ, ແຂວງບໍລິຄໍາໄຊ 1 ໂຮງຮຽນ, ແຂວງໄຊສົມບູນ 1 ໂຮງຮຽນ ແລະ ນະຄອນຫຼວງວຽງຈັນ 1 ໂຮງຮຽນ.

ໂຄງການດັ່ງກ່າວແມ່ນມີຄວາມໝາຍຄວາມສຳຄັນ ແລະ ສອດຄ່ອງກັບຄວາມຕ້ອງການຕົວຈິງຂອງວຽກງານການຫັນເປັນທັນສະໄໝຂອງລັດຖະບານ ໂດຍຄັ້ງນີ້ແມ່ນສະໜອງໃຫ້ຂະແໜງການສຶກສາ ແລະ ກິລາ ແລະ ຫວັງຢ່າງຍິ່ງວ່າ ເຄື່ອງອຸປະກອນ ແລະ ລະບົບຫ້ອງຮຽນດິຈິຕອນນີ້ ຈະເປັນປະໂຫຍດຢ່າງແທ້ຈິງໃຫ້ແກ່ ໂຮງຮຽນ, ຄູ-ອາຈານ ແລະ ນັກຮຽນ ເພື່ອເພີ່ມຄຸນນະພາບການຮຽນ-ການສອນ ໃຫ້ສູງຂຶ້ນກວ່າເກົ່າ ແລະ ມີຫຼາກຫຼາຍຮູບແບບໃນການຖ່າຍທອດບົດຮຽນ.

ເຄື່ອງອຸປະກອນຫ້ອງຮຽນດິຈິຕອນ 1 ຊຸດ ປະກອບມີ: ຈໍໂທລະພາບແບບທັນສະໄໝ (ແບບສໍາພັດ), ເຄື່ອງລະບົບກອງປະຊຸມທາງໄກ, ເຄື່ອງສຽງ, ເຄື່ອງຄອມພິວເຕີແບບຕັ້ງໂຕະ ແລະ ເຄືອງແລັບທອັບ ແລະ ຍັງມີໂປຣແກຣມລະບົບຫ້ອງຮຽນດິຈິຕອນເພື່ອການຮຽນ-ການສອນ ທີ່ໄດ້ພັດທະນາຂຶ້ນເປັນພາສາລາວ ສາມາດນໍາໃຊ້ຜ່ານເວັບ ແລະ ໃຊ້ຜ່ານ Application ໃນມີຖື Android ແລະ iOS. ພ້ອມນັ້ນ, ຍັງມີປື້ມຄູ່ມື ແລະ ຈັດຝຶກອົບຮົມວີທີການຄຸ້ມຄອງນໍາໃຊ້ອຸປະກອນ ແລະ ນໍາໃຊ້ລະບົບລະບົບຫ້ອງຮຽນດິຈິຕອນເພື່ອການຮຽນ-ການສອນ ໃຫ້ຄູອາຈານ ແລະ ນ້ອງໆນັກຮຽນຕື່ມອີກ.

ຕາງໜ້າມອບໃນຄັ້ງນີ້ແມ່ນທ່ານ ປອ. ທະວີສັກ ມະໂນທັມ, ຫົວໜ້າສູນບໍລິຫານລັດດິຈິຕອນ, ກຕສ ແລະ ຕາງໜ້າຮັບໂດຍທ່ານ ພູວັນ ແກ້ວວົງເງິນ, ຮັກສາການອຳນວຍການໂຮງຮຽນ ມັດທະຍົມສົມບູນໂພນທອງ ໂດຍມີທ່ານ ແກ້ວວິສຸກ ໂສລະພົມ, ຮອງລັດຖະມົນຕີ ກຕສ, ທ່ານ Jacob Schemel, ຮອງຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ຫຼື UNDP ປະຈຳ ສປປ ລາວ, ຜູ້ອໍານວຍການໂຮງຮຽນ ມັດທະຍົມສົມບູນ ໂພນທອງ, ບັນດາທ່ານຕາງໜ້າຈາກກະຊວງ ສຶກສາທິການ ແລະ ກິລາ, ພະແນກເຕັກໂນໂລຊີ ແລະ ການສື່ສານ ນະຄອນຫຼວງວຽງຈັນ, ພະແນກສຶກສາທິການ ແລະ ກິລານະຄອນຫຼວງ, ຕາງໜ້າຫ້ອງການສຶກສາທິການ ແລະ ກິລາເມືອງ, ນາຍບ້ານ, ບັນດາຄູ ແລະ ນັກຮຽນ ເຂົ້າຮ່ວມ.