ກອງປະຊຸມຄົບຄະນະບໍລິຫານງານພັກ ກະຊວງເຕັກໂນໂລຊີ ແລະ ການສື່ສານ ສະໄໝທີ II ໄດ້ໄຂຂຶ້ນໃນວັນທີ 30 ທັນວາ 2024, ທີ່ຫ້ອງປະຊຸມ ຊັ້ນ 4 ຂອງສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ສຕສ), ກະຊວງເຕັກໂນໂລຊີ ແລະ ການື່ສານ (ກຕສ). ພາຍໃຕ້ການເປັນປະທານຂອງ ສະຫາຍ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກຕສ, ມີຄະນະບໍລິຫານງານພັກກະຊວງ, ເລຂາໜ່ວຍພັກທົ່ວອົງຄະນະພັກ ກຕສ ເຂົ້າຮ່ວມທັງໝົດ 25 ສະຫາຍ.

ໃນກອງປະຊຸມຄັ້ງນີ້ ໄດ້ຜ່ານຮ່າງບົດສະຫຼຸບຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ປະຈໍາປີ 2024 ແລະ ທິດທາງແຜນການປີ 2025, ຜ່ານຮ່າງບົດສະຫຼຸບແຜນພັດທະນາຂະແໜງເຕັກໂນໂລຊີ ແລະ ການສື່ສານ ແລະ ສະພາບການຫັນເປັນດິຈິຕອນ ຂອງ ສປປ ລາວ ປະຈໍາປີ 2024 ແລະ ທິດທາງແຜນການປີ 2025, ລາຍງານກ່ຽວກັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ພາຍໃນອົງຄະນະພັກ ກຕສ ແລະ ຜ່ານຮ່າງບົດສະຫຼຸບວຽກງານກວດກາ ປະຈໍາປີ 2024 ແລະ ທິດທາງແຜນການປີ 2025. ພ້ອມນັ້ນ, ກອງປະຊຸມຍັງໄດ້ປຶກສາຫາລືເຊິ່ງກັນ ແລະ ກັນ, ປະກອບຄຳຄິດ-ຄຳເຫັນ ແລະ ເສີມຂະຫຍາຍຫົວຄິດປະດິດສ້າງໃຫ້ເລິກເຊິ່ງ, ຢ່າງກົງໄປກົງມາ ເພື່ອປະກອບໃສ່ເນື້ອໃນບົດສະຫຼຸບໃຫ້ມີເນື້ອໃນຄົບຖ້ວນສົມບູນ.

ຕອນທ້າຍຂອງກອງປະຊຸມ, ສະຫາຍ ບັນດິດ ສຈ. ບໍ່ວຽງຄຳ ວົງດາລາ ກໍໄດ້ມີຄຳເຫັນສະຫຼຸບ ພ້ອມທັງໂອ້ລົມໃຫ້ທິດຊີ້ນໍາ ໂດຍໄດ້ເນັ້ນໜັກໃຫ້ບັນດາສະຫາຍ ຄະນະບໍລິຫານງານພັກກະຊວງ ເອົາໃຈໃສ່ເພີ່ມທະວີຄວາມເປັນເຈົ້າການ ຍົກສູງໃນການຫັນເປັນດິຈິຕອນ, ການພັດທະນາຊັບພະຍາກອນມະນຸດນັບທັງການຫັນປ່ຽນຈິນຕະນາການກ້າວໄປ ເພື່ອສືບຕໍ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ກໍຄືມະຕິກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ II ຂອງອົງຄະນະພັກກະຊວງ ເຕັກໂນໂລຊີ ແລະ ການສື່ສານ ໃຫ້ເຂົ້າສູ່ລວງເລິກ ແລະ ເປັນຮູບປະທຳ. ສືບຕໍ່ ຊີ້ນໍາການຈັດຕັ້ງຜັນຂະຫຍາຍເຂົ້າໃນໜ້າທີ່ຄວາມຮັບຜິດຊອບຂອງຕົນໃຫ້ປາກົດຜົນເປັນຈິງ ແລະ ເອົາໃຈໃສ່ນໍາພາ-ຊີ້ນໍາ, ປັບປຸງ, ຍົກສູງຄວາມສາມາດ ແລະ ຄຸນນະພາບການເຄື່ອນໄຫວການປະຕິບັດໜ້າທີ່ການເມືອງທີ່ໄດ້ຮັບມອບໝາຍໃຫ້ສູງຂຶ້ນ ແລະ ມີຜົນສຳເລັດບາດກ້າວອັນໃໝ່ໃນໜ້າທີ່ຄວາມຮັບຜິດຊອບຂອງຕົນ. ພ້ອມທັງ ເອົາໃຈໃສ່ຈັດຕັ້ງປະຕິບັດແຜນການດໍາເນີນກອງປະຊຸມໃຫຍ່ ຂອງບັນດາໜ່ວຍພັກຮາກຖານ, ຄະນະພັກຮາກຖານ ແລະ 3 ອົງການຈັດຕັ້ງມະຊາຊົນ ໃຫ້ສໍາເລັດໄປຕາມແຜນ ແລະ ໄດ້ຮັບຜົນສໍາເລັດອັນຈົບງາມ.

ພາບ ແລະ ຂ່າວ: ເລັກເຊ່ຍ ສຸດທິວົງ.