ປທສ ເຜີຍແຜ່ວຽກງານກວດກາທົ່ວປະເທດ ແລະ ສະຫຼຸບວຽກງານກວດກາ ປະຈໍາປີ 2018.

22/03/2019

ປທສ ເຜີຍແຜ່ວຽກງານກວດກາທົ່ວປະເທດ ແລະ ສະຫຼຸບວຽກງານກວດກາ ປະຈໍາປີ 2018.

           ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ເປິດກອງປະຊຸມ ຜັນຂະຫຍາຍເນື້ອໃນຈິດໃຈກອງປະຊຸມວຽກງານກວດກາທົ່ວປະເທດ ປະຈຳປີ 2018 ແລະ ສະຫຼຸບຖອດຖອນບົດຮຽນການຈັດຕັ້ງປະຕິບັດວຽກງານກວດກາ ປະຈໍາປີ 2018 ແລະ ທິດທາງແຜນການ ໃນປີ 2019 ຂອງກະຊວງ ປທສ, ໃນວັນທີ 21 ມີນາ ຜ່ານມານີ້. ໃຫ້ກຽດເປັນປະທານ ແລະ ເຜີຍແຜ່ເອກະສານໂດຍ ທ່ານ ທອງໃສ ຊານໄຊຍະ ປະທານຄະນະກວດກາພັກ, ຮອງລັດຖະມົນຕີ ກະຊວງ ປທສ, ມີເລຂາໜ່ວຍພັກ/ຮາກຖານພັກ, ປະທານກວດກາໜ່ວຍພັກ/ຮາກຖານພັກ ແລະ ຜູ້ເຮັດວຽກງານກວດກາ ຂອງບັນດາກົມ/ທຽບເທົ່າ, ພະແນກ ປທສ ນະຄອນຫຼວງ ແລະ ບັນດາບໍລິສັດ ລັດວິສາຫະກິດ ອ້ອມຂ້າງກະຊວງເຂົ້າຮ່ວມ.

          ການຈັດກອງປະຊຸມໃນຄັງນີ້, ເພື່ອຈັດຕັ້ງຜັນຂະຫຍາຍເນື້ອໃນຈິດໃຈ ກອງປະຊຸມວຽກງານກວດກາທົ່ວປະເທດ ປະຈຳປີ 2018. ພ້ອມທັງ ສະຫຼຸບຕີລາຄາຖອດຖອນບົດຮຽນ ວຽກງານຕິດຕາມ, ກວດກາ ແລະ ຊຸກຍູ້ ການຈັດຕັ້ງປະຕິບັດວຽກງານກວດກາ ໃນໄລຍະ 1 ປີ ຜ່ານມາ ແລະ ກໍານົດວາງທິດທາງແຜນການຕໍ່ໜ້າ. ໂດຍສະເພາະແມ່ນການຜັນຂະຫຍາຍ, ຈັດຕັ້ງປະຕິບັດ ມະຕິຂອງກອງປະຊຸມໃຫຍ່ຂອງພັກສະໄໝທີ X ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ, ຄັ້ງທີ VIII, ມະຕິຄຳສັ່ງ, ກົົດລະບຽບຂອງພັກ, ນິຕິກຳອື່ນໆ, ການປະຕິບັດພາລະບົດບາດ, ສິດໜ້າທີ ຂອງບັນດາກົມ/ທຽບເທົ່າ, ບໍລິສັດ ລັດວິສາຫະກິດ ທີ່ຂື້ນກັບກະຊວງ ປທສ ແລະ ບັນດາ ພະແນກ ປທສ ແຂວງ/ນະຄອນຫຼວງ.  ເຊິ່ງສາມາດຊອກໃຫ້ເຫັນໄດ້ເຖິງດ້ານດີທີ່ຕັ້ງໜ້າ, ຂໍ້ຄົງຄ້າງ ທີ່ຈະຕ້ອງໄດ້ປັບປຸ່ງແກ້ໄຂ ແລະ ມີບາງບົດຮຽນທີ່ຈະຕ້ອງໄດ້ສົ່ງເສີມຂະຫຍາຍຮ່ວມກັນ.

          ໃນໂອກາດດຽວກັນ ທ່ານ ທອງໃສ ຊານໄຊຍະ ໄດ້ເຜີຍແຜ່ເອກະສານທີ່ສຳຄັນເຊັ່ນ: ບົດສະຫຼຸບຕີລາຄາວຽກງານກວດກາທົ່ວປະເທດ ປະຈຳປີ 2018 ແລະ ທິດທາງແຜນການວຽກງານກວດກາ ໃນປີ 2019 ຂອງຄະນະກວດກາສູນກາງພັກ; ບົດໂອ້ລົມຂອງ ທ່ານ ປອ. ບຸນທອງ ຈິດມະນີ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ຕໍ່ກອງປະຊຸມວຽກງານກວດກາທົ່ວປະເທດ ປະຈຳປີ 2018; ບົດສະຫຼຸບຜົນການຕິດຕາມກວດກາ ແລະ ຊຸກຍູ້ວຽກງານກວດກາ ປະຈໍາປີ 2018 ແລະ ທິດທາງແຜນການ ໃນປີ 2018 ຂອງກະຊວງ ປທສ ແລະ ເຜີຍແຜ່ເຊື່ອມຊືມເນື້ອໃນເອກະສານທີ່ສຳຄັນຈໍານວນໜຶ່ງ. ພ້ອມນີ້, ທ່ານຍັງໄດ້ໂອ້ລົມຕໍ່ກອງປະຊຸມ ຊຶ່ງທ່ານໄດ້ກ່າວວ່າ: ໃນນາມຕ່າງໜ້າຄະນະພັກ, ຄະນະນຳ ກະຊວງ ປທສ ເຫັນໄດ້ຄວາມໝາຍຄວາມສຳຄັນຕໍ່ວຽກງານກວດກາ ດັ່ງຄຳເວົ້າທີ່ວ່າ: ຖ້າບໍ່ມີການກວດກາ ກໍ່   ໝາຍຄວາມວ່າບໍ່ມີການນຳພາ ທີ່ຕິດພັນກັບວຽກງານທຸກຂົງເຂດ ໂດຍເປັນພາລະບົດບາດໜຶ່ງທີ່ສຳຄັນຂອງພັກ ແລະ ການຄຸ້ມຄອງບໍລິຫານລັດ. ນອກນີ້, ທ່ານຍັງໄດ້ເນັ້ນໜັກໃຫ້ ຜູ້ເຂົ້າຮ່ວມນໍາເອົາເນື້ອໃນຈິດໃຈຂອງກອງປະຊຸມໃນຄັ້ງນີ້ ໄປຈັດຕັ້ງເຜີຍແຜ່ໃຫ້ສະມາຊິກພັກ, ພະນັກງານ-ລັດຖະກອນຂອງຕົນ ນຳໄປເຊື່ອມຊືມກໍາແໜ້ນ ພ້ອມກັນຜັນຂະຫຍາຍຈັດຕັ້ງປະຕິບັດບົນຈິດໃຈບຸກທະລຸທີ່ຕັ້ງໜ້າ; ໂດຍຕິດພັນກັບການສືບຕໍ່ສູ້ຊົນຈັດຕັ້ງປະຕິບັດບັນດາຄາດໝາຍ ໃນກອງປະຊຸມໃຫຍ່ ຄັ້ງທີ X ຂອງພັກ ຕິດພັນກັບການສືບຕໍ່ຊຸກຍູ້ຂະບວນການແຂ່ງຂັນ ຮັກຊາດ ແລະ ພັດທະນາ  ເຮັດໃຫ້ວຽກງານຕິດຕາມກວດກາ ໄດ້ຮັບການຈັດຕັ້ງປະຕິບັດຢ່າງແຂງແຮງທົ່ວຂະແໜງການໄປສະນີ, ໂທລະຄົມມະນາຄົມ ແລະ ການສື່ສານ; ເວົ້າລວມ ເວົ້າສະເພາະ ກໍ່ຄືການຈັດຕັ້ງປະຕິບັດແຜນການ, ໂຄງການ ໃນການປະຕິບັດແຜນພັດທະນາ 5 ປີ ຄັ້ງທີ II ຂອງຂະແໜງການ ປທສ ໃຫ້ໄດ້ຮັບປະສິດທິພາບ ແລະ ປະສິດທິຜົນສູງສຸດ.   

              ຂ່າວ: ກົມກວດກາ, ປທສ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ