ປທສ ເປີດຊຸດຝຶກອົບຮົມ ການຂຽນບົດສະເໜີໂຄງການລົງທຶນຂອງລັດ

14/05/2019

ປທສ ເປີດຊຸດຝຶກອົບຮົມ ການຂຽນບົດສະເໜີໂຄງການລົງທຶນຂອງລັດ

      ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ເປີດຊຸດຝຶກອົບຮົມການຂຽນບົດສະເໜີໂຄງການລົງທຶນຂອງລັດ ຕາມແບບຟອມຂອງ ກະຊວງແຜນການ ແລະ ການລົງທຶນ ໃນລະຫວ່າງວັນທີ 07-9 ພຶດສະພາທີ່ຜ່ານມາ, ທີ່ຫ້ອງປະຊຸມຄື່ນຄວາມຖີ່, ສະຖາບັນ ສະຖາບັນເຕັກໂລຊີການສື່ສານຂໍ້ມູນຂ່າວສານ (ສຕສ). ພາຍໃຕ້ການເປັນປະທານ ແລະ ກ່າວເປີດໂດຍ ທ່ານ ເສົານະຄອນ ເພັດວິຫານ ຮອງຫົວໜ້າກົມແຜນການ ແລະ ການຮ່ວມມື, ກະຊວງ ປທສ ມີບັນດາທ່ານຮອງກົມ, ຫົວໜ້າພະແນກ ແລະ ວິຊາການຄະນະຮັບຜິດຊອບວຽກໂຄງການຈາກບັນດາກົມທຽບເທົ່າເຂົ້າຮ່ວມ. ໂດຍມີນັກວິທະຍາກອນ ຈາກກົມປະເມີນຜົນ ກະຊວງ ແຜນການ ແລະ ການລົງທຶນ ຈຳນວນ 2 ທ່ານ ຂຶ້ນນໍາສະເໜີເອກະສານ.

     ການຈັດຝຶກອົບໃນຄັ້ງນີ້ມີ ກໍ່ເພື່ອເປັນການຍົກລະດັບຄວາມຮູ້, ຄວາມສາມາດ, ໃນການຂຽນບົດສະເໜີໂຄງການລົງທຶນລັດ ໃຫ້ແກ່ວິຊາການຂອງບັນດາກົມ/ທຽບເທົ່າ  ພາຍໃນກະຊວງ ປທສໃຫ້ມີຄວາມຊໍານານ ແລະ ຮັບປະກັນການສະເໜີໂຄງການໃຫ້ຖືກຕ້ອງລະບຽບຫຼັກການ ຕາມແບບ ຟອມໃໝ່ຂອງກະຊວງ ແຜນການ ແລະ ການລົງທຶນ, ຊຶ່ງໄດ້ເນັ້ນໃສ່ການຂຽນບົດສະເໜີໂຄງການສົ່ງເສີມວິຊາການທີ່ບໍ່ຕິດພັນກັບການກໍ່ສ້າງ, ໂຄງການສະໜອງວັດຖຸອຸປະກອນ, ໂຄງການສຶກສາຄວາມເປັນໄປໄດ້ ແລະ ອອກແບບເບື້ອງຕົ້ນ ໂຄງການກໍ່ສ້າງ ເຊີ່ງມີທັງພາກທິດສະດີ, ພາກປະຕິບັດການຂຽນໂຄງການ ແລະ ການຂຶ້ນນຳສະເໜີບົດໂຄງການເພື່ອແລກປ່ຽນ ແລະ ຖອດຖອນບົດຮຽນຂອງແຕ່ລະກຸ່ມ.

         ຜ່ານຈາກການຝຶກອົບຮົມໃນຄັ້ງນີ້, ບັນດານັກສຳມະນາກອນໄດ້ຮັບຟັງການນຳສະເໜີບົດ ດ້ວຍຄວາມເອົາໃຈໃສ່ ເພື່ອຈະໄດ້ນຳໄປສືບຕໍ່ຜັນຂະຫຍາຍ ໃນການຈັດຕັ້ງປະຕິບັດໜ້າທີ່ວຽກງານທີ່ຕົນເອງຮັບຜິດຊອບ ໃຫ້ມີປະສິດທິຜົນສູງຂື້ນ ທັງໝົດນີ້ກໍ່ເພື່ອໃຫ້ບັນລຸເປົ້າໝາຍທີ່ກຳນົດໄວ້ໃນແຜນພັດທະນາປະຈຳປີກໍ່ຄືແຜນພັດທະນາ 5 ປີຂອງຂະແໜງການ ປທສ.

       ພາບ+ຂ່າວ: ກົມແຜນການ ແລະ ການຮ່ວມມື, ພະແນກແຜນການ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ