ປທສ ຝຶກອົບຮົມ ການສ້າງສິ່ງແວດລ້ອມທີ່ອຳນວຍໃຫ້ແກ່ຜູ້ປະກອບການເພດຍິງ

04/07/2019

ປທສ ຝຶກອົບຮົມ ການສ້າງສິ່ງແວດລ້ອມທີ່ອຳນວຍໃຫ້ແກ່ຜູ້ປະກອບການເພດຍິງ

      ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ຮ່ວມກັບ ສູນຝຶກອົບຮົມ ເຕັກໂນໂລຊີ ການສື່ສານຂໍ້ມູນຂ່າວສານອາຊີປາຊີຟິກ ເພື່ອການພັດທະນາ/ໜ່ວຍງານເສດຖະກິດ ແລະ ສັງຄົມພາກພຶ້ນອາຊີ ປາຊິຟີກ ຂອງອົງການສະຫະປະຊາຊາດ (Asia Pacific Training Centre for Information and Communication Technology for Development/Economic and Social Commission for Asia and the Pacific (APCICT/ESCAP)), ຂຶ້ນພາຍໃຕ້ຫົວຂໍ້ “ການສ້າງສິ່ງແວດລ້ອມທີ່ອຳນວຍໃຫ້ແກ່ຜູ້ປະກອບການເພດຍິງ, ໃນວັນທີ 4 ກໍລະກົດ 2019 ນີ້, ທີ່ ໂຮງແຮມ ເສດຖາພາເລດ, ນະຄອນຫຼວງວຽງຈັນ ຊຶ່ງໄດ້ດໍາເນີນໄປເປັນເວລາ 2 ວັນ (ລະຫວ່າງວັນທີ 4 – 5 ກໍລະກົດ 2019). ໂດຍການເປັນປະທານກ່າວເປີດຂອງ ທ່ານ ພູຂົງ ຈິດຮູບໂລກ, ຫົວຫນ້າ ກົມແຜນການ ແລະ ການຮ່ວມມື, ກະຊວງ ປທສ ມີບັນດາແຂກທີ່ຖືກເຊີນ ຈາກຕາງໜ້າ APCICT/ESCAP, ຜູ້ບັນຍາຍຈາກຕ່າງປະເທດ, ບັນດາກະຊວງ, ຕາງໜ້າຈາກ ສະພາການຄ້າ ແລະ ອຸດສາຫະກຳ ແຫ່ງຊາດ, ນັກທຸລະກິດຍິງ ແລະ ບໍລິສັດທີ່ໃຫ້ບໍລິການດ້ານໂທລະຄົມມະນາຄົມ ເຂົ້າຮ່ວມ.

       ໃນວາລະດັ່ງກ່າວ ທ່ານ ພູຂົງ ຈິດຮູບໂລກ ໄດ້ມີຄໍາເຫັນວ່າ : ໄອຊີທີ ນອກຈາກຈະມີຜົນປະໂຫຍດ ໃນການຊ່ວຍອຳນວຍຄວາມ ສະດວກໃນຊີວິດປະຈຳວັນຂອງພວກເຮົາແລ້ວ ມັນຍັງເປັນຕົວຊ່ວຍໃນການຂັບເຄື່ອນທຸລະກິດ,​ ການຊອກຕະຫຼາດ ແລະ ການຊອກຊ່ອງທາງໃນການຮ່ວມມືຕ່າງໆ ບໍ່ສະເພາະແຕ່ພາຍໃນປະເທດ ແຕ່ສາມາດຂະຫຍາຍໄປຫາຕະຫຼາດສາກົນອີກດ້ວຍ. ດັ່ງນັ້ນ, ໃນໂລກແຫ່ງ ດິຈິຕອນ ຈຶ່ງເປັນສະພາບແວດລ້ອມທີ່ບໍ່ມີຂອບເຂດ, ເຊື້ອຊາດ,​ ສາດສະໜາ, ອາຍຸ ແລະ ເພດ ຊຶ່ງໝາຍຄວາມວ່າ ເປັນສະພາບແວດລ້ອມທີ່ມີຄວາມເທົ່າທຽມກັນ ແລະ ຂຶ້ນກັບວ່າແຕ່ລະຄົນຈະຍາດແຍ່ງໂອກາດຕ່າງໆໄດ້ແນວໃດ ແຕ່ທັງນີ້ ກໍ່ຈະຕ້ອງຢູ່ບົນພື້ນຖານແຫ່ງຄວາມມີສະຕິ ແລະ ຈັນຍາບັນໃນການນຳໃຊ້. ສະນັ້ນ, ການເປີດຊຸດຝຶກອົບຮົມຄັ້ງນີ້, ຈຶ່ງເປັນໂອກາດອັນດີໃຫ້ແກ່ ພາກລັດ ແລະ ເອກະຊົນ ໄດ້ມີໂອກາດແລກປ່ຽນບົດຮຽນນຳກັນ ເພື່ອສຶບຕໍ່ຜັນຂະຫຍາຍບັນດາແຜນການຕ່າງໆ ໃຫ້ປະກົດຜົນເປັນຈິງ ໃນການຫັນເປັນທັນສະໄໝໄປນຳກັນ ເພື່ອປະກອບສ່ວນໃນການພັດທະນາ ເສດຖະກິດ ແລະ ສັງຄົມ ຂອງປະເທດພວກເຮົາ ໃຫ້ມີການຂະຫຍາຍຕົວ ແລະ ຈະເລີນງອກງາມເພີ່ມຂຶ້ນ.

       ນອກຈາກການຝຶກອົບຮົມ ຄັ້ງນີ້ແລ້ວ,​ ທາງກະຊວງ ປທສ ກໍ່ມີວາລະສານ ໄອຊີທີ ລາວ ທີ່ໃຫ້ຂ່າວສານ ແລະ ຄວາມຮູ້ກ່ຽວກັບ ໄອຊີທີ ເປັນປະຈຳ ໂດຍທຸກຄົນສາມາດເຂົ້າໄປເບິ່ງໄດ້ທາງ ເວັບໄຊຂອງ ກະຊວງ ປທສ (https://mpt.gov.la/). ເຊັ່ນດຽວກັນ, APCICT/ESCAP ກໍ່ມີຫຼາຍເອກະສານ ເພື່ອໃຫ້ຄວາມຮູ້ໃນຂົງເຂດໄອຊີທີ ແລະ ເປີດໃຫ້ທຸກຄົນເຂົ້າໄປສຶກສາຮຽນຮູ້ໄດ້ໂດຍບໍ່ເສຍຄ່າທາງເວັບໄຊຂອງເພິ່ນ (https://www.unapcict.org/).

        ຂ່າວ:   ກົມແຜນການ ແລະ ການຮ່ວມມື, ກະຊວງ ປທສ.

        ພາບ: ຫ້ອງການກະຊວງ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ