ຄະນະຊາວໜຸ່ມ ປະຊາຊົນ ປະຕິວັດລາວ ປທສ ໄດ້ຮັບນາມມະຍົດ ຊາວໜຸ່ມ 4 ບຸກ

10/07/2019

ຄະນະຊາວໜຸ່ມ ປະຊາຊົນ ປະຕິວັດລາວ ປທສ ໄດ້ຮັບນາມມະຍົດ ຊາວໜຸ່ມ 4 ບຸກ

       ພິທີມອບນາມມະຍົດຊາວໜຸ່ມ 4 ບຸກ ປະຈຳປີ 2018 ຂອງຄະນະຊາວໜຸ່ມ ປະຊາຊົນ ປະຕິວັດລາວ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດຂຶ້ນ ໃນຕອນເຊົ້າວັນທີ 10 ກໍລະກົດ 2019 ນີ້, ທີ່ຫ້ອງປະຊຸມໃຫຍ່ ກະຊວງ ປທສ. ໂດຍມີ ສະຫາຍ ປອ. ທັນສະໄໝ ກົມມະສິດ ກຳມະການສູນກາງພັກ, ເລຂາຄະນະພັກ,  ລັດຖະມົນຕີ ກະຊວງ ປທສ, ສະຫາຍ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ພ້ອມດ້ວຍຄະນະຊາວໜຸ່ມ ແລະ ສະມາຊິກຊາວໜຸ່ມອ້ອມຊ້າງກະຊວງ ແລະ ບັນດາແຂກທີ່ຖືກເຊີນເຂົ້າຮ່ວມຢ່າງພ້ອມພຽງ.

       ໃນພິທີ, ສະຫາຍ ແກ້ວວິສຸກ ໂສລະພົມ ຄະນະພັກກະຊວງ, ເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ (ຄຊປປລ) ກະຊວງ ປທສ ໄດ້ຂຶ້ນກ່າວລາຍງານ ຜົນການຈັດຕັ້ງປະຕິບັດວຽກງານ 4 ບຸກ ໃນໄລຍະຜ່ານມາ ຈົນຮອດປີ 2018 ເຊິ່ງໃຫ້ຮູ້ວ່າ: ຄະນະບໍລິຫານງານຊາວໜຸ່ມ ປປລ ກະຊວງ ປທສ ແມ່ນຮາກຖານໜຶ່ງ ທີ່ມີສາຍຕັ້ງ ຂຶ້ນກັບສູນກາງຊາວໜຸ່ມປະຊາຊົນປະຕິວັດລາວ, ສາຍຂວາງ ຂຶ້ນກັບຄະນະພັກກະຊວງ ປທສ, ໂຄງຮ່າງການຈັດຕັ້ງໃນປີ 2018 ມີ 16 ຮາກຖານຂຶ້ນກັບ ເຊິ່ງແບ່ງອອກເປັນ 7 ຮາກຖານ ແລະ 9 ໜ່ວຍ. ໃນນີ້, ບັນດາຮາກຖານ ແລະ ໜ່ວຍ ທີ່ຂຶ້ນກັບ ຄະນະບໍລິຫານງານ ສ່ວນໃຫຍ່  ກໍໄດ້ສຳເລັດການເປີດກອງປະຊຸມໃຫຍ່ພາຍໃນ ຮາກຖານ ແລະ ໜ່ວຍຂອງຕົນແລ້ວ, ເຊິ່ງບາງຮາກຖານໃຫຍ່ ກໍ່ໄດ້ແຍກອອກເປັນໜ່ວຍ ໂດຍອີງຕາມການປັບປຸງໂຄງຮ່າງການຈັດຕັ້ງເບື້ອງລັດ ເພື່ອໃຫ້ສະດວກໃນການເຄື່ອນໄຫວ ແລະ ຕິດຕາມ. ປະຈຸບັນ ຄຊປປລ ກະຊວງ ປທສ ມີທັງໝົດ 18 ຮາກຖານຂຶ້ນກັບ (4 ຮາກຖານ ແລະ 14 ໜ່ວຍ). ດັ່ງນັ້ນ, ເພື່ອກະກຽມຕ້ອນຮັບກອງປະຊຸມ 03 ຂັ້ນ. ຄະນະຊາວໜຸ່ມ ປະຊາຊົນ ປະຕິວັດລາວ ກະຊວງ ປທສ ຈຶ່ງໄດ້ກໍາຂຸ້ນຂ້ຽວກະກຽມເປີດກອງປະຊຸມໃຫຍ່ ໃຫ້ສໍາເລັດໃນເດືອນ ສິງຫາ 2019 ນີ້.

     ພ້ອມນີ້, ຍັງໄດ້ຕັ້ງໜ້າສຶກສາອົບຮົມທາງດ້ານການເມືອງແນວຄິດ ໃຫ້ແກ່ສະມາຊິກຊາວໜຸ່ມ ໃຫ້ເຊື່ອມຊຶມຕໍ່ແນວທາງ ນະໂຍບາຍຂອງພັກ-ລັດ, ໃຫ້ມີແນວຄິດຫຼັກໝັ້ນ, ມີຄຸນສົມບັດສິນທຳປະຕິວັດ, ເຊື່ອໝັ້ນຕໍ່ການນຳພາຂອງພັກ, ມີນໍ້າໃຈຮັກຊາດ, ຮັກລະບອບໃໝ່ ແລະ ມີຄວາມເປັນເອກະພາບຕໍ່ທິດທາງນຳພາຂອງພັກ ຢ່າງສະເໝີຕົ້ນສະເໝີປາຍ, ຈັດຕັ້ງເຜີຍແຜ່ມະຕິ X ຂອງສູນກາງພັກ, ເຜີຍແຜ່ເນື້ອໃນມະຕິກອງປະຊຸມຜູ້ແທນຊາວໜຸ່ມທົ່ວປະເທດສະໄໝທີ VII, ຈັດຕັ້ງໃຫ້ສະມາຊິກຊາວໜຸ່ມເຂົ້າຮ່ວມ ຮັບຟັງປາຖະກະຖາວັນສຳຄັນຂອງຊາດ, ຈັດຕ້ັງສຳມະນາໃນຫົວຂໍ້ຕ່າງໆ ເປັນຕົ້ນ: ຜົນກະທົບຂອງສື່ສັງຄົມອອນລາຍ, ເຂົ້າຮ່ວມຝືກອົບຮົມໃນຫົວຂໍ້ “ການຂຽນບົດ, ຂຽນຂ່າວ, ຮູບພາບລົງໃນໜັງສືພີມ ແລະ ສື່ເອເລັກໂຕຣນິກ, ເຂົ້າຮ່ວມການກະກຽມງານ ແລະ ຮ່ວມງານເວທີສົນທະນາການຮ່ວມມື ລາວ-ຈີນ ພາຍໃຕ້ຫົວຂໍ້ “ໜຶ່ງແລວ ໜຶ່ງເສັ້ນທາງ, ການສ້າງຕັ້ງລະບົບໂຄງລ່າງພື້ນຖານດາວທຽມ ເພື່ອສົ່ງເສີມການຮ່ວມມື ແລະ ພັດທະນາດ້ານໂທລະຄົມ, ວັດທະນະທຳ ລາວ-ຈີນ, ເຂົ້າຮ່ວມກອງປະຊຸມເຜີຍແຜ່ບົດລາຍງານແຫ່ງຊາດກ່ຽວກັບການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ, ເຜີຍແຜ່ຂໍ້ກໍານົດກົດລະບຽບຂອງຊາວຫນຸ່ມ ແລະ ມະຕິຄໍາສັ່ງຕ່າງໆ.

       ຄຊປປລ ກະຊວງ ປທສ ໄດ້ປະຕິບັດຂໍ້ແຂ່ງຂັນ 4 ບຸກຂອງສູນກາງຊາວໜຸ່ມ ປະຊາຊົນປະຕິວັດລາວວາງອອກ ພາຍໃຕ້ການຊີ້ນຳ-ນຳພາ ຂອງຄະນະພັກ ກະຊວງ ປທສ ແລະ ສູນກາງຊາວໜຸ່ມ ປະຊາຊົນ ປະຕິວັດລາວ ພ້ອມທັງເປັນການຜັນຂະຫຍາຍເນື້ອໃນມະຕິກອງປະຊຸມຜູ້ແທນຊາວໜຸ່ມທົ່ວປະເທດສະໄໝທີ VII, ເຊິ່ງໃນໄລຍະດັ່ງກ່າວ ຄຊປປລ ກະຊວງ ປທສ ໄດ້ເອົາໃຈໃສ່ຢ່າງເອົາຈິງເອົາຈັງ ແລະ ໜັກແໜ້ນ ໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຈົນໄດ້ຮັບນາມມະຍົດ ຄະນະບໍລິຫານງານ ຊາວໜຸ່ມ ປະຊາຊົນ ປະຕິວັດລາວ 4 ບຸກ, ປະກອບມີ: (1) ບຸກດ້ານການເມືອງແນວຄິດ, (2) ບຸກດ້ານການຝຶກຝົນຫຼໍ່ຫຼອມການຮຽນ, (3) ບຸກດ້ານການຈັດຕັ້ງ ແລະ (4) ບຸກດ້ານວິຊາຊີບ-ສ້າງວຽກເຮັດງານທຳ, ຕາມມາດຕະຖານ ແລະ ເງື່ອນໄຂ ຂອງ ສູນກາງຊາວໜຸ່ມ ປະຊາຊົນ ປະຕິວັດລາວ ວາງອອກ. ຜົນງານດັ່ງກ່າວ ລ້ວນແລ້ວແຕ່ແມ່ນການປະກອບສ່ວນຂອງຊາວໜຸ່ມແຕ່ລະຮາກຖານ/ໜ່ວຍ ພ້ອມດ້ວຍສະມາຊິກທຸກສະຫາຍ ມີຄວາມສາມັກຄີເປັນເອກະພາບກັນປະຕິບັດຂໍ້ແຂງຂັນ 4 ບຸກ ຢ່າງຕັ້ງໜ້າ.

         ໃນປີ 2018 ສະມາຊິກຊາວໝຸ່ມທົ່ວ ກະຊວງ ປທສ ມີ ຈຳນວນ 2.233 ສະຫາຍ, ສະມາຊິກຊາວໜຸ່ມ ທີ່ໄດ້ປະເມີນ ທັງໝົດຈຳນວນ 2.012 ສະຫາຍ ກວມ 90,1%, ເຊິ່ງຈັດເປັນປະເພດ ແຂງ 1.950 ສະຫາຍ (97%) ແລະ ກາງ 62 ສະຫາຍ (3%), ໃນຂໍ້ແຂ່ງຂັນແຕ່ລະດ້ານ ປະກອບມີ ດ້ານການເມືອງແນວຄິດໄດ້ 95%, ການເຝິກຝົນຫຼໍ່ຫຼອມດ້ານການຮໍ່າຮຽນໄດ້ 92%, ດ້ານການຈັດຕັ້ງໄດ້ 91% ແລະ ດ້ານການສ້າງວິຊາຊີບ ແລະ ວຽກເຮັດງານທຳ 90%.

        ພ້ອມດຽວກັນນັ້ນ, ສະຫາຍ ປອ. ທັນສະໄໝ ກົມມະສິດ ແລະ ສະຫາຍ ອາລຸນໄຊ ສູນນະລາດກໍ່ໄດ້ໃຫ້ກຽດເປີດແຖບຜ້າເພື່ອເປັນການຢັ້ງຢືນນາມມະຍົດ ຄະນະຊາວໜຸ່ມ ປະຊາຊົນ ປະຕິວັດລາວ 4 ບຸກ ຂອງຄະນະຊາວໜຸ່ມ ປະຊາຊົນ ປະຕິວັດລາວ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ, ພ້ອມທັງໄດ້ລັ່ນຄ້ອງ 9 ບາດ ຢ່າງເປັນທາງການ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ