ປທສ ເປີດຊຸດຝຶກອົບຮົມທິດສະດີການເມືອງ ແລະ ການປົກຄອງໄລຍະສັ້ນ 45 ວັນ.

13/08/2019

ປທສ ເປີດຊຸດຝຶກອົບຮົມທິດສະດີການເມືອງ ແລະ ການປົກຄອງໄລຍະສັ້ນ 45 ວັນ.

          ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດພິທີເປີດຊຸດຝຶກອົບຮົມ ທິດສະດີການເມືອງ ແລະ ການປົກຄອງໄລຍະສັ້ນ 45 ວັນ, ຊຸດທີ V ຂຶ້ນໃນວັນທີ 12 ສິງຫານີ້, ທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ສຕສ). ໃຫ້ກຽດກ່າວເປີດພິທີໂດຍ ສະຫາຍ ທອງໃສ ຊານໄຊຍະ ຮອງເລຂາຄະນະພັກ, ຮອງລັດຖະມົນຕີ ກະຊວງ ປທສ, ມີການເຂົ້າຮ່ວມຂອງ ສະຫາຍ ຮສ ສະໝຸດທອງ ສົມພານິດ ຄະນະພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ພ້ອມດ້ວຍຄະນະພັກບັນດາກົມ/ທຽບເທົ່າ, ຄະນະພັກຮາກຖານບໍລິສັດລັດວິສາຫະກິດຜູ້ໃຫ້ບໍລິການດ້ານໂທລະຄົມ ແລະ ນັກສໍາມະນາກອນ.

          ການເປີດຊຸດຝຶກອົບຮົມໃນຄັ້ງນີ້, ແມ່ນມີຄວາມສໍາຄັນ ແລະ ຈໍາເປັນພາວະວິໃສ ສໍາລັບພະນັກງານຫຼັກແຫຼ່ງ, ນໍາພາ, ຄຸ້ມຄອງ ສຶບທອດ ປ່ຽນແທນ ທີ່ຈະຕ້ອງມີຄວາມຮັບຮູ້ເຂົ້າໃຈຢ່າງເລີກເຊິ່ງກ່ຽວກັບບັນຫາພື້ນຖານ ທິດສະດີ ມາກ-ເລນິນ ເຊັ່ນ: ປັດສະຍາ, ເສດຖະກິດການເມືອງ, ລັດທິສັງຄົມນິຍົມວິທະຍາສາດ, ທິດສະດີກ່ຽວກັບການກໍ່ສ້າງພັກ, ການບໍລິຫານການປົກຄອງ ແລະ ນິຕິກໍາ ເພື່ອຍົກສູງຄວາມເປັນເຈົ້າການ ໃນການນໍາພາ ເຊື່ອມຊຶມແນວທາງນະໂຍ ບາຍຂອງພັກ, ຜັນຂະຫຍາຍ ແລະ ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ x ຂອງພັກ ແລະ ມະຕິກອງປະຊຸມໃຫຍ່ຄັ້ງທີ I ຂອງອົງຄະນະພັກກະຊວງ ປທສ ຕາມທິດທາງແຜນການຂອງກະຊວງວາງອອກ ໃນແຕ່ລະໄລຍະ ໃຫ້ມີຂະບວນການຟົດຟື້ນ, ແຂງແຮງ, ຕໍ່ເນື່ອງ ເຂົ້າສູ່ລ່ວງເລີກ ແລະ ສາມາດໝູນໃຊ້ເຂົ້າໃນວຽກງານຕົວຈິງ, ເຮັດໃຫ້ວຽກງານບັນລຸຜົນສໍາເລັດດ້ວຍຄຸນນະພາບສູງ ແລະ ສາມາດຕອບສະໜອງຕາມຄວາມຮຽກຮ້ອງຕ້ອງການຂອງວຽກງານ ໄອຊີທີໃນໄລຍະໃໝ່. ການເປີດຊຸດຝຶກອົບຮົມຄັ້ງນີ້, ແມ່ນໄດ້ຮັບການຮ່ວມມື ແລະ ຊ່ວຍເຫຼືອ ທາງດ້ານເນື້ອໃນຫຼັກສູດ ແລະ ນັກວິທະຍາກອນຈາກ ສະຖາບັນການເມືອງ ແລະ ການປົກຄອງແຫ່ງຊາດ, ຊຶ່ງປະກອບມີ 5 ພາກ, 37 ບົດ ແລະ ການຂຶ້ນຫ້ອງສອນຂອງຄະນະນໍາກະຊວງ ປທສ.

          ໃນຕ້ອນທ້າຍ ສະຫາຍ ທອງໃສ ຊານໄຊຍະ ໄດ້ກ່າວວ່າ: ພະນັກງານແມ່ນກົກເຄົ້າຂອງວຽກງານ, ວຽກງານໃດໜຶ່ງຈະມີຜົນສໍາເລັດກໍ່ແມ່ນຂຶ້ນກັບພະນັກງານ. ດັ່ງນັ້ນ, ການບໍາລຸງກໍ່ສ້າງພະນັກງານ, ການພັດທະນາ ແລະ ການຍົກສູງຄວາມຮູ້ຄວາມສາມາດຂອງພະນັກງານ-ສະມາຊິກພັກ ແມ່ນວຽກງານໜຶ່ງທີ່ສໍາຄັນ ແລະ ຈໍາເປັນທີ່ສຸດ ໂດຍສະເພາະ ການບໍາລຸງກໍ່ສ້າງ ທາງດ້ານທິດສະດີການເມືອງ ແລະ ການປົກຄອງ ຂອງພະນັກງານນໍາພາ-ຄຸ້ມຄອງ ທີ່ເປັນເສນາທິການໃຫ້ແກ່ຄະນະພັກ, ຄະນະນໍາ ໃນການຄົ້ນຄວ້າ ຈັດຕັ້ງຜັນຂະຫຍາຍແນວທາງຂອງພັກ-ລັດ ເວົ້າລວມ ເວົ້າສະເພາະ ກໍ່ຄືຍຸດທະສາດ ແລະ ວິໃສທັດຂອງກະຊວງ ຕໍ່ກັບວຽກງານ ໄອຊີທີ ໃຫ້ເປັນໃຈກາງໃນການຂັບເຄື່ອນເສດຖະກິດທັນສະ    ໄໝ.

          ຂ່າວ: ກົມຈັດຕັ້ງ-ພະນັກງານ, ປທສ.

          ພາບ: ຫ້ອງການ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາລະສານ ໄອຊີທີ ສະບັບທີ 13
ລະ​ບົບ​ຂື້ນ​ທະ​ບຽນ​ປະ​ຊຸມ