ປທສ ສໍາມະນາ ແລະ ເປີດນໍາໃຊ້ລະບົບອິນເຕີເນັດຟຣີວາຍຟາຍ.

03/09/2019

ປທສ ສໍາມະນາ ແລະ ເປີດນໍາໃຊ້ລະບົບອິນເຕີເນັດຟຣີວາຍຟາຍ.

           ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ຮ່ວມກັບ ອົງການໂທລະຄົມມະນາຄົມອາຊີ-ປາຊີຟິກ (Asia-Pacific Telecommunity (APT)) ໄດ້ຈັດກອງປະຊຸມສໍາມະນາ ແລະ ເປີດນໍາໃຊ້ລະບົບ ອິນເຕີເນັດ ຟຣີວາຍຟາຍ ເພື່ອສົ່ງເສີມການທ່ອງທ່ຽວ ແລະ ການສຶກສາ ຢູ່ ສປປ ລາວ ຂຶ້ນໃນວັນທີ 3 ກັນຍາຜ່ານມານີ້, ທີ່ໂຮງແຮມ ລາວພຣາຊ່າ, ນະຄອນຫຼວງວຽງຈັນ. ໂດຍການເປັນປະທານຮ່ວມຂອງ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງ ປທສ ແລະ ທ່ານ ນາງ ອາຣີວານ ຣາວລັງສີ (Areewan HAORANGSI) ເລຂາທິການໃຫຍ່ ອົງການ APT ມີບັນດາຜູ້ຕາງໜ້າຈາກກົມ/ທຽບເທົ່າ ພາຍໃນກະຊວງ ປທສ ພ້ອມດ້ວຍແຂກທີ່ຖືກເຊີນຈາກພາກສ່ວນທີ່ກ່ຽວຂ້ອງທັງພາກລັດ ແລະ ເອກະຊົນເຂົ້າຮ່ວມຢ່າງພ້ອມພຽງ.

          ກອງປະຊຸມສໍາມະນາຄັ້ງນີ້, ຈັດຂຶ້ນເພື່ອທົບທວນຄືນການຈັດຕັ້ງປະຕິບັດ ວຽກງານໃນໄລຍະຜ່ານມາ ໂດຍຄະນະຮັບຜິດຊອບໂຄງການ ແລະ ເຕັກນິກຊ່ຽວຊານ ຈາກ ສ.ເກົາຫຼີ. ພ້ອມນີ້, ກອງປະຊຸມຍັງ ໄດ້ຍົກໃຫ້ເຫັນເຖິງຄວາມສໍາຄັນໃນການສົ່ງເສີມການນໍາໃຊ້ ຟຣີວາຍຟາຍ, ອິນເຕີເນັດເຂົ້າໃນວຽກງານການທ່ອງທ່ຽວ ແລະ ການສືກສາຢູ່ໃນ ສປປ ລາວ ໂດຍສະເພາະນະຄອນຫຼວງວຽງຈັນ ໄດ້ກໍານົດໃຫ້ມີການຕິດຕັ້ງ 03 ຈຸດຄື: ສະໜາມບິນສາກົນວັດໄຕ, ສວນອາຫານນໍ້າພຸ ແລະ ຫໍພະແກ້ວ)

          ທ່ານ ບຸນສະເຫຼີມໄຊ ເຄນນາວົງ ໄດ້ກ່າວວ່າ: ໃນປັດຈຸບັນ ການພັດທະນາ ແລະ ການເຕີບໃຫຍ່ຂະຫຍາຍ ຕົວຢ່າງບໍ່ຢຸດຢັ້ງ ໃນຍຸກຂອງເສດຖະກິດດີຈີຕອນ ໄດ້ມີບົດບາດສຳຄັນຫຼາຍໃນການປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ ໃນທຸກໆປະເທດ ກໍ່ຄືການນໍາໃຊ້ເຂົ້າໃນຊີວິດປະຈຳວັນຂອງພວກເຮົາ, ເຮັດໃຫ້ຊີວິດການເປັນຢູ່ມີຄວາມທັນສະໄໝ. ຄຽງຄູ່ກັນນັ້ນ, ອຸດສາຫະກຳ ການທ່ອງທ່ຽວໃນປະເທດເຮົາ ໄດ້ມີການຂະຫຍາຍຕົວໃນແຕ່ລະປີ, ເພື່ອຕອບສະໜອງ ຄວາມຕ້ອງການໃນການເຂົ້າເຖິງອິນເຕີເນັດໃນທຸກສະຖານທີ່ທ່ອງທ່ຽວໃນປະເທດ. ຊຶ່ງ ສປປ ລາວ, ໄດ້ມີເຄືອຂ່າຍໂທລະສັບມືຖືກວມເອົາ 94%, ອິນເຕີເນັດ 78% ຂອງຈໍານວນບ້ານທັງໝົດໃນທົ່ວປະເທດ, ມີຜູ້ໃຊ້ອິນເຕີເນັດເກືອບ 40% ຂອງປະຊາກອນທັງໝົດ. ເຊິ່ງໄດ້ສະແດງໃຫ້ເຫັນເຖິງການຂະຫຍາຍຕົວຂອງຜູ້ຊົມໃຊ້ສື່ສັງຄົມອອນລາຍໃນລາວເຊັ່ນກັນ.

          ກະຊວງ ປທສ ໄດ້ຮັບການຊ່ວຍເຫຼືອ ຈາກ ອົງການ APT ໃນການສະໜອງງົບປະມານ ເພື່ອຈັດຕັ້ງປະຕິບັດໂຄງການສົ່ງເສີມການນໍາໃຊ້ຟຣີວາຍຟາຍອິນເຕີເນັດ ເພື່ອສົ່ງເສີມການທ່ອງ ທ່ຽວໃນລາວ ແລະ ສ້າງສິ່ງອໍານວຍຄວາມສະດວກໃຫ້ແກ່ນັກທ່ອງທ່ຽວ ໃນການຊົມໃຊ້ອິນເຕີເນັດແບບບໍ່ເສຍຄ່າ ເປັນທາງເລືອກທີ່ດີອີກທາງ  ໜຶ່ງ. ຊຶ່ງໂຄງການນີ້ ຖືເປັນການເລີ່ມຕົ້ນທໍາອິດ ທີ່ເຮັດໃຫ້ ສປປ ລາວ ໂດຍສະເພາະ ນະຄອນຫຼວງວຽງຈັນ ໄດ້ມີຟຣີອິນເຕີເນັດ ທີ່ສາມາດນໍາໃຊ້ໃນຂອບເຂດສະຖານທີ່ທ່ອງທ່ຽວສໍາຄັນ ເປັນຕົ້ນ: ສະໝາມບິນສາກົນວັດໄຕ, ສວນສາທາລະນະນໍ້າພຸໃຈກາງເມືອງ ແລະ ບໍລິເວນພິພິທະພັນຫໍພະແກ້ວ ຊຶ່ງເປັນໄລຍະທົດລອງການໃຫ້ບໍລິການ 1 ປີ ໃນຕໍ່ໜ້າ.

          ໃນຕອນທ້າຍກອງປະຊຸມ, ຄະນະປະທານນໍາໂດຍ ທ່ານ ບຸນສະເຫຼີມໄຊ ເຄນນາວົງ ແລະ ທ່ານນາງ Areewan HAORANGSI, ເລຂາທິການໃຫຍ່ APT ໄດ້ໃຫ້ກຽດຂຶ້ນຕັດແຖບຜ້າ ເປີດນໍາໃຊ້ ຟຣີວາຍຟາຍອິນເຕີເນັດ ໃນສະຖານທີ່ທ່ອງທ່ຽວ ພາຍໃນນະຄອນຫຼວງວຽງຈັນ ຢ່າງເປັນທາງການ.

            ຂ່າວ: ກົມໄອຊີທີ, ປທສ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ