ກອງປະຊຸມໃຫຍ່ ຄັ້ງທີ III ຂອງຄະນະບໍລິຫານງານສະຫະພັນກໍາມະບານກະຊວງ ປທສ.

10/10/2019

ກອງປະຊຸມໃຫຍ່ ຄັ້ງທີ III ຂອງຄະນະບໍລິຫານງານສະຫະພັນກໍາມະບານກະຊວງ ປທສ.

ຄະນະບໍລິຫານງານສະຫະພັນກໍາມະບານກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ເປີດກອງປະຊຸມໃຫຍ່ຂຶ້ນຢ່າງເປັນທາງການ ໃນວັນທີ 10 ຕຸລານີ້, ທີ່ສູນຮ່ວມມືລາວ-ຢີ່ປຸ່ນ (ICTC), ນະຄອນຫຼວງວຽງຈັນ. ໂດຍການເປັນປະທານຂອງ ສະຫາຍ ຄໍາພູ ດວງຖະໜອມ ປະທານສະຫະພັນກໍາມະບານກະຊວງ ປທສ,  ຫົວໜ້າກົມຈັດຕັ້ງ-ພະນັກງານ, ປທສ​. ໃຫ້ກຽດເຂົ້າຮ່ວມໂດຍ ສະຫາຍ ທອງໃສ ຊານໄຊຍະ ຮອງເລຂາຄະນະພັກ, ເລຂາຄະນະຊາວໜຸ່ມ, ປະທານສະຫະພັນແມ່ຍິງ, ຮອງລັດຖະມົນຕີກະຊວງ ປທສ ແລະ ສະຫາຍ ປ້ານ ນ້ອຍມະນີ ປະທານສູນກາງສະຫະພັນກໍາມະບານລາວ, ກໍາມະການສູນກາງພັກ ພ້ອມດ້ວຍບັນດາຄະນະບໍລິຫານງານ, ຄະນະກໍາມະບານຮາກຖານ, ຄະນະໜ່ວຍ, ສະມາຊິກຈາກບັນດາກົມ/ທຽບເທົ່າ ແລະ ບໍລິສັດອ້ອມຂ້າງກະຊວງ.

          ການຈັດກອງປະຊຸມໃນຄັ້ງນີ້, ເພື່ອສະຫຼຸບການປະຕິບັດວຽກງານກໍາມະບານໃນໄລຍະ 05 ປີ ຜ່ານມາ (2015-2019) ແລະ ວາງທິດທາງແຜນການ 05 ຕໍ່ໜ້າ (2020-2024). ໃນກອງປະຊຸມໄດ້ຮັບຟັງບົດລາຍງານການເມືອງ ແລະ ບົດສໍາຫຼວດການນໍາພາຂອງຄະນະບໍລິຫານງານສະຫະພັນກໍາມະບານກະຊວງ ປທສ ຕໍ່ບັນດາຜົນສໍາເລັດ ແລະ ຜົນງານໃນການຈັດຕັ້ງປະຕິບັດວຽກງານ ທີ່ຍາດມາໄດ້ ໃນໄລຍະ 05 ປີ ຜ່ານມາ. ພ້ອມນັ້ນ, ຍັງໄດ້ຍົກໃຫ້ເຫັນສະພາບໂດຍລວມທີ່ມີທັງດ້ານດີ, ດ້ານອ່ອນ ແລະ ຂໍ້ຄົງຄ້າງ ທີ່ຈະຕ້ອງໄດ້ສືບຕໍ່ແກ້ໄຂປັບປຸງ ກໍ່ຄື ການກໍານົດຄາດໝາຍສູ້ຊົນ ແລະ ທິດທາງແຜນການ 05 ປີຕໍ່ໜ້າ. ນອກຈາກຜົນສໍາເລັດທາງດ້ານວິຊາສະເພາະແລ້ວ ຍັງໄດ້ເອົາໃຈໃສ່ກໍ່ສ້າງຂະບວນການປະຕິບັດຂໍ້ແຂງຂັນ 05 ເປັນເຈົ້າຂອງ ທີ່ ສກລ ວາງອອກ. ນອກນີ້, ແຕ່ລະຮາກຖານຍັງໄດ້ມີກອງທຶນຊ່ວຍເຫຼືອຂອງຕົນ ເພື່ອຊ່ວຍເຫຼືອຊຶ່ງກັນ ແລະ ກັນ, ໄດ້ມີການເຊັນສັນຍາລວມໝູ່ ແລະ ໄດ້ເອົາໃຈໃສ່ປົກປ້ອງສິດ ຜົນປະໂຫຍດອັນຊອບທໍາຂອງກັນ ແລະ ກັນ.

          ສະຫະພັນກໍາມະບານກະຊວງ ປທສ ປະກອບມີ 06 ຮາກຖານ, 48 ໜ່ວຍ, 95 ຈຸ, ສະມາຊິກທັງໝົດ 2,429 ສະຫາຍ, ຍິງ 1,010 ສະຫາຍ ໃນນັ້ນ, ສັງກັດຢູ່ຂົງເຂດລັດ 479 ສະຫາຍ, ຍິງ 189 ສະຫາຍ ແລະ ຂົງເຂດລັດວິສາຫະກິດ 1,950 ສະຫາຍ, ຍິງ 821 ສະຫາຍ ສາມາດຂະຫຍາຍສະມາຊິກໄດ້1,137 ສະຫາຍ. 

          ໃນຕອນທ້າຍ ສະຫາຍ ປ້ານ ນ້ອຍມະນີ ໄດ້ໃຫ້ກຽດໂອ້ລົມຕໍ່ກອງປະຊຸມ ແລະ ໃຫ້ທິດຊີ້ນໍາໃນການຈັດຕັ້ງປະຕິບັດ ມະຕິກອງປະຊຸມໃຫຍ່ ທີ່ມີຄວາມໝາຍຄວາມສໍາຄັນ, ໜັກແໜ້ນ ແລະ ເຕັມໄປດ້ວຍບົດຮຽນອັນລໍ້າຄ່າ. ພ້ອມນັ້ນ, ສະຫາຍ ຍັງໄດ້ເນັ້ນໜັກໃຫ້ ຄະນະບໍລິຫານງານຊຸດໃໝ່ ເພີ່ມທະວີການເອົາໃຈໃສ່ປະຕິບັດວຽກງານທີ່ຖືກມອບ  ໝາຍ, ດ້ວຍຄວາມຮັບຜິດຊອບສູງ ເພື່ອເປັນບ່ອນອີງ ໃນການຊີ້ນໍາ-ນໍາພາ ຂະບວນການວຽກງານກໍາມະບານ ກ້າວໄປຢ່າງບໍ່ຢຸດຢັ້ງ, ເອົາໃຈໃສ່ເພີ່ມທະວີກໍາແໜ້ນທິດທາງ, ນະໂຍບາຍຂອງພັກ-ລັດ ແຕ່ລະໄລຍະ ເວົ້າລວມ, ເວົ້າສະເພາະ ກໍ່ຄື ຜັນຂະຫຍາຍແນວທາງ ມະຕິກອງປະຊຸມກໍາມະບານ ທົ່ວປະເທດຄັ້ງທີ  VII ເພື່ອຈັດຕັ້ງປະຕິບັດໃຫ້ໄດ້ຮັບຜົນສໍາເລັດສູງສຸດ.

 

ວາ​ລະ​ສານ ໄອ​ຊີ​ທີ
ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ລະ​ບົບ​ຂື້ນ​ທະ​ບຽນ​ປະ​ຊຸມ