ປາຖະກະຖາ ວັນຕ້ານການສໍ້ລາດບັງຫຼວງສາກົນ ຄົບຮອບ 16 ປີ

16/01/2020

ປາຖະກະຖາ ວັນຕ້ານການສໍ້ລາດບັງຫຼວງສາກົນ ຄົບຮອບ 16 ປີ

          ໃນຕອນເຊົ້າ ຂອງວັນທີ 16 ມັງກອນນີ້, ທີ່ຫ້ອງປະຊຸມໃຫຍ່ ສູນຝຶກອົບຮົມຄື້ນຄວາມຖີ່ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດກອງປະຊຸມປາຖະກະຖາວັນຕ້ານການສໍ້ລາດບັງຫຼວງສາກົນ ຄົບຮອບ 16 ປີ (9 ທັນວາ 2003 – 9 ທັນວາ 2019) ໃນທ່າມກາງບັນຍາກາດທົ່ວພັກ ທົ່ວປວງຊົນລາວທັງຊາດ ສໍາເລັດການສະເຫຼີມສະຫຼອງ ວັນສະຖາປະນາ ສປປ ລາວ ຄົບຮບ 44 ປີ ແລະ ວັນສໍາຄັນຕ່າງໆຂອງພັກ-ຂອງຊາດ ຢ່າງມີເນື້ອໃນເລິກເຊິ່ງ. ພ້ອມດຽວກັນນັ້ນ, ກໍ່ພວມອອກແຮງງານແຂ່ງຂັນສືບຕໍ່ ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ່ X ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງ VIII ຂອງລັດຖະບານ ໃນໄລຍະທ້າຍສະໄໝ ບົນຈິດໃຈຍູ້ແຮງຂະບວນກໍ່ສ້າງໜ່ວຍພັກປອດໃສ ເຂັ້ມແຂງໜັກແໜ້ນ ເພື່ອກະກຽມໃຫ້ກອງປະຊຸມໃຫ່ຍ 03 ຂັ້ນຂອງຕົນ, ການແຂ່ງຂັນ “ຮັກຊາດ ແລະ ພັດທະນາ”. ເວົ້າສະເພາະ ກໍຄືແຜນພັດທະນາ 05 ປີ ຄັ້ງທີ II ຂອງຂະແໜງການ ປທສ. ໃຫ້ກຽດເປັນປະທານເຜີຍແຜ່ໂດຍ ທ່ານ ທອງໃສ ຊານໄຊຍະ ປະທານຄະນະກວດກາພັກ, ຮອງລັດຖະມົນຕີກະຊວງ ປທສ ມີຄະນະພັກ, ເລຂາໜ່ວຍພັກ ບັນດາກົມ/ທຽບເທົ່າ, ເລຂາຄະນະພັກຮາກຖານ ບັນດາບໍລິສັດ ລັດວິສາຫະກິດ ອ້ອມຂ້າງກະຊວງ ປທສ ແລະ ພະນັກງານ ເຂົ້າຮ່ວມ.

          ການຈັດກອງປະຊຸມໃນຄັ້ງນີ້, ໂດຍຈັດຕັ້ງປະຕິບັດຕາມແຈ້ງການ ຂອງອົງການກວດກາລັດຖະບານ ສະບັບເລກທີ 1493/ອກລ.ຫກ ລົງວັນທີ 09 ທັນວາ 2019; ເພື່ອຄວາມເປັນເອກະພາບໃນຂອບເຂດທົ່ວປະເທດ ແລະ ເພິ່ມທະວີຄວາມຮັບຜິດຊອບຂອງຄະນະພັກ-ຄະນະນຳແຕ່ລະຂັ້ນ, ຕິດພັນກັບຜົນງານການກວດກາສະກັດກັ້ນ ແລະ ຕ້ານການສໍ້ລາດບັງຫຼວງ ຢູ່ໃນຂະແໜງ ປທສ. ເປັນການເລົ່າຄືນປະຫວັດຄວາມເປັນມາຂອງສົນທິສັນຍາສະຫະປະຊາຊາດ ວ່າດ້ວຍການຕ້ານການສໍ້ລາດບັງຫຼວງສາກົນ ທີ່ໄດ້ໝູນວຽນມາບັນຈົບ ຄົບຮອບ 16 ປີ ເພື່ອໃຫ້ພະນັກງານມີຄວາມຮັບຮູ້ ເຂົ້າໃຈຢ່າງເລິກເຊິ່ງ ຕໍ່ຜົນຮ້າຍກໍ່ຄືໄພອັນຕະລາຍ ຂອງການຕ້ານການສໍ້ລາດບັງຫຼວງ, ຕ້ານການຟຸມເຟີອຍ ແລະ ປະຕິບັດນະໂຍບາຍປະຢັດແຫ່ງຊາດ, ຂຸດຄົ້ນ ແລະ ຄຸ້ມຄອງທຸກແຫຼ່ງລາຍຮັບ ແລະ ຊັບພະຍາກອນເປັນຂອງຊາດ ເພື່ອນຳໃຊ້ເຂົ້າໃນພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມັ່ງຄັ້ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄິປອງດອງ, ມີປະຊາທິປະໄຕ, ຍຸຕິທຳ ແລະ ສີວິໄລ. ເນື່ອງຈາກ ການສໍ້ລາດບັງຫຼວງ ພວມເປັນໄພຂົ່ມຂູ່ເຖີງຄວາມມີສະຖຽນລະພາບ ຂອງການຈັດຕັ້ງທັງພາກລັດ ແລະ ເອກະຊົນ ກໍ່ໃຫ້ເກີດຄວາມບໍ່ສະຫງົບ, ຄວາມບໍ່ຍຸຕິທຳໃນທົ່ວສັງຄົມ, ເປັນການບັ່ນທອນກຳລັງແຮງ ກໍ່ຄືຄວາມເຊື່ອໝັ້ນ ແລະ ຄ່ານິຍົມຂອງສັງຄົມ ຕໍ່ອຳນາດການປົກຄອງແຕ່ລະຂັ້ນ ແລະ ການຈັດຕັ້ງຕ່າງໆ ຂອງພາກລັດ.

          ໃນຕອນທ້າຍ, ທ່ານປະທານຍັງໄດ້ເນັ້ນໜັກໃຫ້ຄະນະພັກ-ຄະນະນຳແຕ່ລະຂັ້ນ ສືບຕໍ່ບຸກທະລຸ ເອົາໃຈໃສ່ເຊື່ອມຊືມ ແລະ ນໍາໄປຈັດຕັ້ງປະຕິບັດ ຜັນຂະຫຍາຍ ສົນທິສັນຍາສາກົນວ່າດ້ວຍການຕ້ານການສໍ້ລາດບັງຫຼວງ ຢູ່ ສປປລາວ ໃຫ້ເຂັ້ມແຂງ ແລະ ປະກົດຜົນເປັນຈີງ. ສຶກສາອົບຮົມ ໂຄສະນາເຜີຍແຜ່ ບັນດານິຕິກໍາທີ່ກ່ຽວຂ້ອງ ເພື່ອປູກຈິດສຳນຶກຕໍ່ການສະກັດກັ້ນ ແລະ ຕ້ານການສໍ້ລາດບັງຫຼວງ, ຕ້ອງຖືສຳຄັນ ແລະ ເພີ່ມທະວີການປຸກລະດົມ ທຸກເປົ້າໝາຍໃນສັງຄົມໃຫ້ຮັບຮູ້-ເຂົ້າໃຈ ເຫັນໄດ້ໄພອັນຕະລາຍຂອງການສໍ້ລາດບັງຫຼວງ, ພ້ອມທັງເປັນເຈົ້າການໃນການຕິດຕາມ, ກວດກາ ແລະ ແກ້ໄຂທຸກກໍລະນີທີ່ມີພຶດຕິກໍາໃນແຕ່ລະຂົງເຂດ ທີ່ມີຄວາມສ່ຽງ ແລະ ສ້າງເງື່ອນໄຂສະດວກ ດ້ານຕ່າງໆໃຫ້ແກ່ການປະຕິບັດວຽກງານ ຕິດຕາມ-ກວດກາ, ສະກັດກັ້ນ ແລະ ຕ້ານການສໍ້າດບັງຫຼວງ ດັ່ງຄຳຂວັນທີ່ວ່າ “ຮ່ວມແຮງຮ່ວມໃຈ ຕ້ານການສໍ້ລາດບັງຫຼວງ” .

            ຂ່າວ: ກົມກວດກາ, ປທສ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ