ທ່ານ ປອ. ທັນສະໄໝ ກົມມະສິດ ປາຖະກະຖາ ໃນຫົວຂ້: ການຄຸ້ມຄອງ ແລະ ນຳໃຊ້ສື່ສັງຄົມອອນລາຍ

30/01/2020

ທ່ານ ປອ. ທັນສະໄໝ ກົມມະສິດ ປາຖະກະຖາ ໃນຫົວຂ້: ການຄຸ້ມຄອງ ແລະ ນຳໃຊ້ສື່ສັງຄົມອອນລາຍ

          ໃນຕອນເຊົ້າຂອງວັນທີ 30 ມັງກອນນີ້, ທີ່ສະໂມສອນສູນວິໄຈດິນ ກະຊວງກະສິກຳ ແລະ ປ່າໄມ້ (ວິທະຍາເຂດດົງໂດກ),  ທ່ານ ປອ. ທັນສະໄໝ ກົມມະສິດ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ  ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ),  ໃຫ້ກຽດຂຶ້ນປາຖະກະຖາ ໃນຫົວຂໍ້: ການຄຸ້ມຄອງ ແລະ ນໍາໃຊ້ສື່ສັງຄົມອອນລາຍ ໃນກອງປະຊຸມຝຶກອົບຮົມວຽກງານໂຄສະນາອົບຮົມທົ່ວປະເທດ ປະຈໍາປີ 2019 ໂດຍມີຕາງໜ້າຈາກໂຄສະນາອົບຮົມສູນກາງພັກ ແລະ ຈາກໂຄສະນາອົບຮົມທົ່ວປະເທດເຂົ້າຮ່ວມ.

         ທ່ານ ລັດຖະມົນຕີ ກະຊວງ ປທສ ໄດ້ຍົກໃຫ້ເຫັນເຖິງສະພາບລວມພື້ນຖານໂຄງລ່າງທາງດ້ານເຕັກນິກ ແລະ ບົດບາດຂອງອິນເຕີເນັດ ທີ່ຖືກນຳເຂົ້າມາຮັບໃຊ້ວຽກງານທຸກຂະແໜງການ ນັບມື້ນັບຫຼາຍຂຶ້ນ ເພື່ອອໍານວຍຄວາມສະດວກ ໃນການຕິດຕໍ່ສື່ສານ, ການຄ້າ, ທຸລະກິດ ແລະ ອື່ນໆ ບໍ່ວ່າຈະເປັນການຊຳລະພາສີອາກອນ, ຊຳລະຄ່າໃຊ້ຈ່າຍ, ການຊື້ຂາຍອອນລາຍ, ລະບົບຂົນສົ່ງ, ການເຜີຍແຜ່ຂ່າວສານ ແລະ ວຽກງານລັດຖະບານເອເລັກໂຕຣນິກ. ນອກນັ້ນ, ອິນເຕີເນັດ ກໍ່ຍັງເປັນພື້ນຖານໃຫ້ແກ່ການພັດທະນາສື່ສັງຄົມອອນລາຍ ຫຼື ສື່ໃນໄລຍະໃໝ່ ທີ່ກາຍເປັນ ແອັບພຼິເຄຊັນ ຫຼິ້ນເທິງມືຖື ຢ່າງແຜ່ຫຼາຍ ແລະ ຖືກນໍາໃຊ້ຫຼາຍທີ່ສຸດ ເຊິ່ງກໍ່ມີການນຳໃຊ້ຫລາກຫລາຍຮູບແບບ ທັງດ້ານຕັ້ງໜ້າ ແລະ ດ້ານຫຍໍ້ທໍ້ ເປັນຕົ້ນກໍ່ແມ່ນການອອກຂ່າວປອມຕ່າງໆ ເພື່ອປັ່ນປ່ວນສັງຄົມ.

         ໃນໂອກາດດຽວກັນນີ້, ທ່ານ ປອ. ທັນສະໄໝ ກົມມະສິດ ຍັງໄດ້ຮຽກຮ້ອງມາຍັງ ຄະນະພັກ, ຄະນະນໍາທຸກຂັ້ນ ເພີ່ມທະວີສຶກສາອົບຮົມການເມືອງແນວຄິດພະນັກງານ-ວິຊາການ, ທະຫານ, ຕຳຫຼວດ, ນັກຮຽນ, ນັກສຶກສາ, ປະຊາຊົນບັນດາເຜົ່າປະຊາຊົນບັນດາເຜົ່າ ເຂົ້າຮ່ວມເຮັດວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ, ຈັດຕັ້ງເຊື່ອມຊຶມ ແນວທາງຂອງພັກ, ລະບຽບ, ນິຕິກຳຂອງລັດ ກ່ຽວກັບ ການຄຸ້ມຄອງນຳໃຊ້ສື່ສັງຄົມອອນລາຍ ໃຫ້ທົ່ວສັງຄົມ ເພື່ອໃຫ້ມີຄວາມຮັບຮູ້ ແລະ ເຂົ້າໃຈແຈ້ງ ກ່ຽວກັບບັນດາແນວທາງນະໂຍບາຍຂອງພັກ, ກົດໝາຍ, ລະບຽບການ ແລະ ແຜນງານຂອງລັດຖະບານ ທີ່ວາງອອກໃນແຕ່ລະໄລຍະໃຫ້ຖືກຕ້ອງທ່ວງທັນຕາມສະພາບການໃນປັດຈຸບັນ. ພ້ອມທັງ ສາມາດອະທິບາຍໄດ້ອັນຖືກອັນຜິດ ຕີຕ້ານກົນອຸບາຍຫັນປ່ຽນໂດຍສັນຕິຂອງອິດທິກຳລັງປໍລະປັກ ໃນການໂຄສະນາເຜີຍແຜ່ຂໍ້ມູນຂ່າວສານທີ່ບໍ່ຖືກຕ້ອງ, ໂຄສະນາບິດເບືອນ, ໃສ່ຮ້າຍປ້າຍສີທັບຖົມ, ໂຈມຕີພັກ-ລັດ, ສ້າງຄວາມປັ່ນປ່ວນ, ແບ່ງແຍກຄວາມສາມັກຄີລະຫວ່າງປະຊາຊົນບັນດາເຜົ່າ ຜ່ານອິນເຕີເນັດ ແລະ ສື່ສັງຄົມອອນລາຍ.

          ຂ່າວ: ສູນອິນເຕີເນັດແຫ່ງຊາດ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ