ປທສ ເຜີຍແຜ່ ຜົນຂອງກອງປະຊຸມ Telmin

06/02/2020

ປທສ ເຜີຍແຜ່ ຜົນຂອງກອງປະຊຸມ Telmin

          ກົມແຜນການ ແລະ ການຮ່ວມມື, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດກອງ​ປະ​ຊຸມເຜີຍແຜ່ ຜົນຂອງກອງປະຊຸມລັດຖະມົນຕີໄອຊີທີອາຊຽນ ຄັ້ງທີ 19 (TELMIN 19) ແລະ ກອງ​ປະ​ຊຸມ​ປິ່ນ​ອ້ອມ, ຮ່າງແຜນ​ແມ່​ບົດ ດິ​ຈິ​ຕອນ ອາ​ຊຽນ 2025, ແນະ​ນຳຂັ້ນ​ຕອນ ແລະ ວິທີການຂຽນ​ບົດ​ສະ​ເໜີກິດ​ຈະ​ກຳ ພາຍ​ໃຕ້​ຂອບ​ການ​ຮ່ວມ​ມື ອາ​ຊຽນ ແລະ ປະ​ເທດ​ຄູ່​ຮ່ວມ ຂຶ້ນໃນລະຫວ່າງວັນທີ 06 ກຸມພາ 2020 ນີ້, ທີ່ ຫ້ອງປະຊຸມໃຫຍ່ກະຊວງ ປທສ, ໂດຍການເປັນປະທານຂອງ ທ່ານ ພູຂົງ ຈິດຮູບໂລກ ຫົວໜ້າກົມແຜນການ ແລະ ການຮ່ວມມື, ກະຊວງ ປທສ, ທັງ​ເປັນ​ເຈົ້າ​ໜ້າ​ທີ່​ອາວຸ​ໂສ ໄອ​ຊີ​ທີ​ອາ​ຊຽນ ຂອງ ສ​ປ​ປ ລາວ. ມີບັນດາຫົວໜ້າກົມ, ຫົວໜ້າພະແນກ, ວິຊາການ ແລະ ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.

          ການຈັດກອງປະຊຸມໃນຄັ້ງນີ້, ກໍ່ເພື່ອເປັນການເຜີຍແຜ່ ແລະ ຜັນຂະຫຍາຍ​ໝາກຜົນຂອງກອງປະຊຸມ TELMIN19 ຄັ້ງຜ່ານມາ ທີ່ ສ​ປ​ປ ລາວ ເຮົາ​ໄດ້​ຮັບກຽດເປັນເຈົ້າພາບ, ສະພາບການປະຈຸບັນຂອງອາຊຽນໃນຂະແໜງການໄອຊີທີ ເປັນ​ຕົ້ນ​ແມ່ນການປ່ຽນຊືື່ ກອງປະຊຸມລັດຖະມົນຕີ ໄອຊີທີ ອາຊຽນ (TELMIN) ຈາກ​ຊື່ເດີມມາເປັນ ກອງປະຊຸມ ລັດຖະມົນຕີ ດິຈິຕອນ (ADGMIN) ແລະ ກອງປະຊຸມເຈົ້າໜ້າທີ່ອາວຸໂສໂທລະຄົມ (TELSOM) ຈາກເດີມ ມາເປັນ ກອງປະຊຸມເຈົ້າໜ້າທີ່ອາວຸໂສດິຈິຕອນ ອາ​ຊຽນ (ADGSOM), ​ເຜີ​ຍແຜ່ ຮ່າງແຜນແມ່ບົດ ດິຈິຕອນ ອາຊຽນ 2025 (ADMP 2025), ພ້ອມນີ້, ຍັງໄດ້ແນະນຳຂັ້ນຕອນ ແລະ ວິທີການຂຽນບົດສະເໜີກິດຈະກຳ ພາຍໃຕ້ກອງທຶນ ອາຊຽນ ແລະ ປະເທດຄູ່ຮ່ວມ ເພື່ອເປັນແນວທາງໃນການຂຽນບົດສະເໜີກິດຈະກຳ ໃນ​ສົກ​ປີ 2020 ເພື່ອ​ຈັດ​ຕັ້ງ​ປະ​ຕິ​ບັດ ໃນ​ປີ 2021.

          ທ່ານ ພູຂົງ ຈິດຮູບໂລກ ໄດ້ກ່າວວ່າ ໃນໄລຍະຜ່ານມາ ຂອບການຮ່ວມມືອາຊຽນ ກໍ່ໄດ້ຮັບການສະໜັບສະໜູນ ແລະ ໃຫ້ຄວາມສົນໃຈໃນການເປັນ​ຄູ່ຮ່ວມພັດທະນາ ຈາກຫຼາຍປະເທດ ເປັນຕົ້ນ ສປ.ຈີນ,  ສ.ເກົາຫຼີ, ຍີ່ປຸ່ນ, ອິນເດຍ, ສະຫະລັດອາເມລິກາ,  ສະຫະພາບ ເອີຣົບ ແລະ  ອົງການໄອທີຢູ. ​ຊຶ່ງໃນແຕ່ລະປີ ນອກຈາກກິດຈະກໍາ ຝືກອົບຮົມ, ສໍາມະນາ ແລະ ແລກປ່ຽນບົດຮຽນດ້ານໄອຊີທີ ພາຍໃນ 10 ປະເທດ ແລ້ວ ກໍ່ຍັງມີ ການແລກປ່ຽນ ກັບບັນດາປະເທດຄູ່ຮ່ວມ ທີ່ ສປປ ລາວ ສາມາດຍາດແຍ່ງ​ມາໄດ້ ຫຼາຍກວ່າ  200 ທຶນ ໃນປີ 2019 ແລະ ຫຼາຍໆ​ກິດ​ຈະ​ກຳ ເຊັ່ນ: ກິດ​ຈະ​ກຳການປະເມີນຜົນການຈັດຕັັ້ງປະຕິບັດ ເເຜນແມ່ບົດອາຊຽນໄອຊິທີ2020 (Final Review of ASEAN ICT Masterplan 2020 (AIM2020), ກິດຈະກໍາການສໍາມະນາຍຸດທະສາດ ເພືື່ອສົ່ງເສີມການນໍາໃຊ້ ສືື່ອິນເຕີເນັດທ້ອງຖີ່ນ ຂອງອາຊຽນ (Strategic workshop and guidelines to promote the use of IDN and IDN ccTLDs among ASEAN Community), ກິດຈະກໍາການສືກສາເພືື່ອການນຳໃຊ້ ໄອຊີທີ ໃນການແຈ້ງເຕືອນໄພພິບັດ (Develop guideline and common standard of natural disaster notification system). ພ້ອມນີ້,  ສ​ປ​ປ ລາວ ຍັງໄດ້ຮັບ​ກຽດ​ເປັນ​ເຈົ້າ​ພາບຈັດງານປະກວດແຂ່ງຂັນຜະລິດຕະພັນ ໄອຊີທີອາ​ຊຽນ ປະ​ຈຳ​ປີ 2019 (The 2019 ASEAN ICT Award) ຕາມ​ຮອບ​ໝູນ​ວຽນ​ຂອງ​ອາ​ຊຽນ ພາຍ​ໃຕ້​ກອງ​ທຶ​ນ AICTF. ຊຶ່ງ ສ​ປ​ປ​ ລາວ ກໍ່ໄດ້ຮັບສອງລາງວັນຄື: Application Goteddy- ການຈັດສົ່ງອາຫານຜ່ານແອັບ​ມື​ຖື ແລະ Application Road Tax  ການຊຳລະຄ່າທາງຜ່ານແອັບ.

ໃນການເຜີຍແຜ່ນັກສໍາມະນາ ​ຈະ​ໄດ້ມີຄວາມຮູ້ ແລະ ຄວາມເຂົ້າໃຈຕໍ່ກັບນະໂຍບາຍ ແລະ ທິດທາງໃນການຈັດຕັ້ງປະຕິບັດ ໃນຂະແໜງການ ໄອຊີທີ ຂອງ ອາຊຽນ ແລະ ທີ່​ສຳ​ຄັນ​ແມ່ນ​ເພື່ອຮຽນຮູ້ ວິທີການ-ຂັ້ນຕອນ ໃນການຂຽນບົດສະ  ເໜີກິດ​ຈະ​ກຳ ແລະ ການຈັດຕັ້ງປະຕິບັດ ໃຫ້​ຖືກ​ຕາມ​ເປົ້າ​ໝາຍ-ລະບຽບການ​ຕ່າງໆ ຂອງ​ອາ​ຊຽນ ​ເພື່ອ​ຈະ​ນຳ​ໄປ​ເປັນແນວທາງໃຫ້ຂຽນໂຄງການ ເພື່ອຍາດແຍ່ງເອົາທຶນຈາກອາຊຽນ ແລະ ປະເທດຄູ່ຮ່ວມ ໃນ​ສົກ​ປີ 2021 ນີ້.​ ນອກນັ້ນ, ນັກສໍາມະນາກອນຈະໄດ້ມີການປຶກສາຫາລື, ຖອດຖອນບົດຮຽນຮ່ວມກັນ, ພ້ອມທັງຂໍ້ສະເໜີ ເພື່ອເປັນແນວທາງໃນການຈັດຕັ້ງປະຕິບັດ ໃນການກຽມຄວາມພ້ອມຂອງ ສປປ ລາວ ໃນການຫັນເປັນ ດີຈິຕອນ ໂດຍນຳໃຊ້ ໄອຊີທີ ໃນການຂັບເຄື່ອນ ແລະ ຮ່ວມກັນພັດທະນາ ເພື່ອບັນລຸໄດ້ເປົ້າໝາຍອາຊຽນໂດຍລວມ.

           ຂ່າວ: ພະແນກອາຊຽນ, ກົມແຜນການ ແລະ ການຮ່ວມມື, ປທສ.

         ພາບ: ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ