ປທສ ຂື້ນທະບຽນເລກໝາຍໂທລະສັບມືຖື

13/02/2020

ປທສ ຂື້ນທະບຽນເລກໝາຍໂທລະສັບມືຖື

           ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ດຳເນີນບັ້ນແຂ່ງຂັນສ້າງຂະບວນການ ເພື່ອ ຂ່ຳນັບຮັບຕ້ອນກອງປະຊຸມໃຫຍ່ ຄັ້ງທີ II ອົງຄະນະພັກ ກະຊວງ. ໂດຍການ ຂື້ນທະບຽນເລກໝາຍໂທລະສັບມືຖື ຜ່ານລະບົບທີ່ທັນສະໄໝ ນຳໃຊ້ແອບພິເຄຊັ້ນ 3 ແກຼັບ (Application 3 Short) ໃຫ້ບັນດາ ພະນັກງານ ກົມ, ສູນ/ສະຖາບັນ ແລະ ອົງການ ທີ່ຢູ່ໃນຮົ້ວສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໃນລະຫວ່າງ ວັນທີ 06-07 ກຸມພາຜ່ານມານີ້, ທີ່ ຫ້ອງປະຊຸມ ຕຶກ E ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ໃຫ້ກຽດກ່າວເປີດພິທີໂດຍ ທ່ານ ບັນຈົງ ເພັດສີແດງ ຫົວ ໜ້າອົງການດັດສົມ ໂທລະຄົມມະນາຄົມ, ກະຊວງ ປທສ.

          ວຽກງານຂື້ນທະບຽນເລກໝາຍໂທລະສັບມືຖື ແມ່ນເປັນວຽກງານໜຶ່ງທີ່ມີ ຄວາມໝາຍ ຄວາມສຳຄັນລະດັບຊາດ, ເປັນພື້ນຖານໂຄງລ່າງໃຫ້ແກ່ການຫັນເປັນເສດຖະກິດ ດີຈີຕອນໃນອານາຄົດ, ຊື່ງຄວາມຖືກຕ້ອງ ແລະ ຊັດເຈນຂອງຂໍ້ມູນຜູ້ນຳໃຊ້ເລກໝາຍໂທລະສັບມືຖື ແມ່ນມີຄວາມສຳຄັນຕິດພັນກັບຫຼາຍວຽກງານເປັນຕົ້ນ: ວຽກ ປ້ອງກັນຊາດ-ປ້ອງກັນຄວາມສະຫົງບ, ວຽກການເງິນ-ການທະນາຄານ, ການຄ້າ-ຂາຍ ອອນລາຍ ແລະ ອື່ນໆ. ການຢັ້ງຢືນຕົວຕົນບຸກຄົນທີ່ນຳໃຊ້ເລກໝາຍໂທລະສັບຢ່າງຖືກຕ້ອງຊັດເຈນຈຶ່ງມີຄວາມສໍາຄັນໃນປະຈຸບັນ ແລະ ອານາຄົດ. ສະນັ້ນ, ກະຊວງ ປທສ ຈື່ງສ້າງລະບົບຄຸ້ມຄອງການຂື້ນທະບຽນ 03 ແກຼັບ ຂື້ນ ເພຶ່ອຕອບສະໜອງຕໍ່ຄວາມຮຽກຮ້ອງຕ້ອງການ ຕາມລະດັບການພັດທະນາທາງການນຳໃຊ້ ດ້ານເຕັກໂນໂລຊີ, ໄອຊີທີ ທີ່ຈະກ້າວມາເປັນປັດໃຈພື້ນຖານໜຶ່ງ ທີ່ຂາດບໍ່ໄດ້ໃນການດຳລົງຊີວິດຂອງປະຊາຊົນລາວໃນອານາຄົດ.

          ການສ້າງຂະບວນການໃນຄັ້ງນີ້ ມີຜູ້ເຂົ້າຮ່ວມຈາກ 3 ກົມ, 2 ສູນ, 1 ສະຖາບັນ ແລະ 1 ອົງການ ລວມຈຳນວນຜູ້ເຂົ້າຮ່ວມທັງໝົດ 225 ທ່ານ, ເຊິ່ງເປັນພະນັກງານຂອງ ກະຊວງ ປທສ ຈຳນວນ 209 ທ່ານ, ໂດຍການຮ່ວມມືກັນຂອງ ຄະນະຮັບຜິດຊອບ ຈາກກະຊວງ ປທສ ແລະ ບັນດາບໍລິສັດ ຜູ້ໃຫ້ບໍລິການໂທລະຄົມມະນາຄົມ ໃນການປຸກລະດົມ ພະນັກງານເພຶ່ອເຂົ້າຮ່ວມການຂື້ນທະບຽນດ້ວຍລະບົບ 3 ແກັຼບຢ່າງເປັນຂະບວນຟົດຟື້ນ, ຄຽງຄູ່ກັນນັ້ນບໍລິສັດຜູ້ໃຫ້ບໍລິການດ້ານໂທລະຄົມກໍ່ໄດ້ຈັດຂະບວນການຂື້ນທະບຽນຢ່າງພົດພື້ນຢູ່ບັນດາສຳນັກງານໃຫຍ່ຂອງແຕ່ລະບໍລິສັດລວມຈຳນວນຜູ້ເຂົ້າຮ່ວມທັງໝົດ 7161 ຄົນ. ໃນອານາຄົດ ແມ່ນຈະຂື້ນທະບຽນເລກໝາຍໂທລະສັບມືຖື ໃຫ້ກວມເອົາຈຳນວນຫຼາຍຂອງປະຊາກອນທົ່ວປະເທດ ໃຫ້ໄດ້ຕາມເປົ້າໝາຍທີ່ວາງໄວ້.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາລະສານ ໄອຊີທີ ສະບັບທີ 14
ລະ​ບົບ​ຂື້ນ​ທະ​ບຽນ​ປະ​ຊຸມ