ລັດຖະມົນຕີ ກະຊວງ ປທສ ເຂົ້າຮ່ວມກອງປະຊຸມສະຫຼຸບວຽກງານ ລລທ.

13/02/2020

ລັດຖະມົນຕີ ກະຊວງ ປທສ ເຂົ້າຮ່ວມກອງປະຊຸມສະຫຼຸບວຽກງານ ລລທ.

         ໃນຕອນບ່າຍຂອງວັນທີ 11 ກຸມພານີ້, ບໍລິສັດ ໂທລະຄົມມະນາຄົມ ມະຫາຊົນ (ລລທ), ໄດ້ຈັດກອງປະຊຸມປະຊຸມສະຫຼຸບວຽກງານປະຈໍາປີ 2019 ຂຶ້ນ ທີ່ຫ້ອງປະຊຸມໃຫຍ່, ສໍານັກງານໃຫຍ່ ລລທ, ນະຄອນຫຼວງວຽງຈັນ. ໂດຍການເປັນປະທານຂອງ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ ລລທ. ໃຫ້ກຽດເຂົ້າຮ່ວມໂດຍ ທ່ານ ປອ ທັນສະ ໄໝ ກົມມະສິດ ກໍາມະການສູນກາງພັກ, ລັດຖະມົນຕີກະຊວງ ໄປສະນີ, ໂທລະຄົມ ມະນາຄົມ ແລະ ການສື່ສານ (ປທສ) ມີຜູ້ແທນຈາກສູນກາງ ແລະ ສາຂາແຂວງ ທົ່ວປະເທດ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

          ທ່ານ ສຸພົນ ຈັນທະວີໄຊ ໄດ້ຂຶ້ນຜ່ານບົດສະຫຼຸບຜົນການເຄື່ອນໄຫວວຽກງານດໍາເນີນທຸລະກິດໃນປີ 2019 ແລະ ທິດທາງແຜນການປີ 2020. ຊຶ່ງໃນໄລຍະ 01 ປີຜ່ານມາ ລລທ ສາມາດຍາດໄດ້ຫຼາຍຜົນງານທີ່ພົ່ນເດັ່ນເຊັ່ນ: ໄດ້ລົງທຶນຂະຫຍາຍຕາໜ່າງລະບົບໂທລະຄົມມະນາຄົມ ໃນມູນຄ່າ 25,93 ລ້ານໂດລາສະຫະລັດ, ປະຈຸບັນມີສະຖານີມືຖື  2G, 3G, 4G, 4.5G ທັງໝົດ 7.436 ສະຖານີ ໃນນີ້, GSM 2G ຈໍານວນ 1.928 ສະຖານີ, 3G ຈໍານວນ 2.843 ສະຖານີ, 4G ຈໍານວນ 2.045 ສະຖານີ ແລະ 4.5G ຈໍານວນ 620 ສະຖານີ, IP Core/P RAN 1.343 ແລະ FTTP ຈໍານວນ 66.294 Port ກວມ 47% ຂອງຫຼັງຄາເຮືອນໃນເຂດເທດສະບານ, ສັນຍານໂທລະສັບ ກວມ 80%ໃນນັ້ນ 4G ກວມ 58%. ມີລູກຄ້າໃຊ້ໃຊ້ໂທລະສັບມືຖື 1.4 ລ້ານເລກໝາຍ, ຕັ້ງໂຕະ 33 ພັນເລກໝາຍ, ວິນໂຟນ 304 ພັນເລກໝາຍ, ອິນເຕີເນັດ 1.3 ພັນລູກຄ້າ, ສາມາດສ້າງລາຍຮັບໄດ້ທັງໝົດ 1.702,5 ຕື້ກີບ ກວມເອົາ 17,6% ຂອງລາຍຮັບທີ່ ລລທ ປະຕິບັດໄດ້ໃນປີ 2019. ນອກນັ້ນ, ຍັງໄດ້ປັບປຸງລະບຽບ, ນະໂຍບາຍສະຫວັດດີການສັງຄົມຕ່າງໆ ເພື່ອຍົກສູງລະດັບຊີວິດການເປັນຢູ່ໃຫ້ພະນັກງານດີຂຶ້ນເລື້ອຍໆ ຄຽງຄູ່ກັບການດໍາເນີນທຸລະກິດ ຍັງໄດ້ປະກອບສ່ວນຊ່ວຍເຫຼືອ ແລະ ໃຫ້ການອຸປຖໍາຕໍ່ອົງການຈັດຕັ້ງພັກ-ລັດ ແລະ ສັງຄົມ ຈໍານວນ 2,1 ຕື້ກີບ.

          ສໍາລັບທິດທາງແຜນການໃນປີ 2020 ລລທ ຈະສືບຕໍ່ສ້າງຖານຂໍ້ມູນລູກຄ້າໃໝ່ໃຫ້ເພີ່ມຂຶ້ນ 97.934 ເລກ

ໝາຍ, ສືບຕໍ່ລົງທຶນ ປັບປຸງ ແລະ ຂະຫຍາຍເຄື່ອຂ່າຍການໃຫ້ບໍລິການດ້ານໂທລະຄົມ ໂດຍສະເພາະ  Mobile Broadband and fixed Broadbandໃຫ້ຮັບປະກັນດ້ານປະລິມານ ແລະ ຄຸນນະພາບ, ຂໍ້ມູນມີຄວາມປອດໄພ ແລະ ເປັນລະບົບທັນສະໄໝ ຮັບປະກັນໃຫ້ແກ່ການບໍລິການສັງຄົມ ໃຫ້ບັນລຸແຜນຍຸດທະສາດ ແລະ ວິໃສທັດກ້າວໄປສູ່ຍຸກດິຈິຕອນ.

          ໃນຕອນທ້າຍ ທ່ານ ປອ ທັນສະໄໝ ກົມມະສິດ ໄດ້ໃຫ້ກຽດໂອ້ລົມຕໍ່ກອງປະຊຸມ ຊຶ່ງກ່ອນອຶ່ນໝົດທ່ານໄດ້ສະແດງຄວາມຍ້ອງຍໍຊົມເຊີຍຜົນງານທີ່ຍາດມາໄດ້ໃນໄລຍະ 01 ປີຜ່ານມາ. ພ້ອມນີ້, ທ່ນຍັງໄດ້ເນັ້ນໜັກໃຫ້ ລລທ ເອົາໃຈໃສ່ປັບປຸງເສີມຂະຫຍາຍ ແລະ ຄົ້ນຄ້ວາຮໍ່າຮຽນແນວທາງແຜນນະໂຍບາຍຂອງພັກ, ແຜນພັດທະນາເສດຖະກິດ - ສັງຄົມ 5 ປີ ຄັ້ງທີ VIII ຂອງລັດຢ່າງຕັ້ງໜ້າ. ພ້ອມດຽວກັນນັ້ນກໍຕ້ອງຈັດຕັ້ງຜັນຂະຫຍາຍເປັນແຜນການ, ໂຄງການ ແລະ ແຜນງານລະອຽດ, ເສີມຂະຫຍາຍດ້ານດີຜົນງານທີ່ຍາດມາໄດ້ ແລະ ຮີບຮ້ອນແກ້ໄຂບັນດາຈຸດອອ່ນ, ຂໍ້ຄົງຄ້າງ ທີ່ເຫັນວ່າເປັນອຸປະສັກກີດຂວາງການຈັດຕັ້ງປະຕິບັດ ກໍ່ຄືແຜນພັດທະນາເສດຖະກິດ - ສັງຄົມຂອງລັດ, ເພີ່ມທະວີບຳລຸງສ້າງພະນັກງານໃຫ້ມີຄວາມໜັກແໜ້ນທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ມີຈັນຍາບັນ, ຈັນຍາທໍາ, ມີຄວາມຮູ້ຄວາມສາມາດໃຫ້ສົມຄູ່ກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່,  ສືບຕໍ່ປົກປັກຮັກສາ, ບູລະນະພື້ນຖານໂຄງລ່າງລະບົບໂທລະຄົມມະນາຄົມໃຫ້ຮັບປະກັນຄຸນນະພາບໄປຄູ່ກັບການພັດທະນາ ແລະ ນຳເອົາເຕັກນິກ, ເຕັກໂນໂລຊີໃໝ່ມາຮັບໃຊ້ສັງຄົມ, ຫັນການບໍລິການດ້ານໂທລະຄົມມະນາຄົມໃຫ້ເປັນຂະແໜງອຸດສາຫະກຳທີ່ທັນສະໄໝເພື່ອເຊື່ອມໂຍງກັບພາກພື້ນ-ສາກົນ, ສ້າງຈຸດຂາຍ ແລະ ການບໍລິການ ໃຫ້ມີຫລາກຫລາຍທາງເລືອກ ເພີ່ມສີສັນຂອງຜະລິດ ຕະພັນໃຫ້ໂດດເດັ່ນຕອບສະໜອງໄດ້ຄວາມຕ້ອງການຂອງຜູ້ຊົມໃຊ້ໃນປັດຈຸບັນ.

          ພາບ+ຂ່າວ: ຫ້ອງການ, ພະແນກເລຂານຸການ-ພິທີການ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາລະສານ ໄອຊີທີ ສະບັບທີ 14
ລະ​ບົບ​ຂື້ນ​ທະ​ບຽນ​ປະ​ຊຸມ