ທ່ານ ທອງໃສ ຊານໄຊຍະ ຊຸກຍູ້ວຽກງານ ພະແນກ ປທສ ແຂວງໄຊຍະບູລີ.

19/03/2020

ທ່ານ ທອງໃສ ຊານໄຊຍະ ຊຸກຍູ້ວຽກງານ ພະແນກ ປທສ ແຂວງໄຊຍະບູລີ.

       ເມື່ອບໍ່ດົນມານີ້, ທ່ານ ທອງໃສ ຊານໄຊຍະ ຮອງລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ເດີນໄປເຄື່ອນໄຫວເຮັດວຽກ ແລະ ຊຸກຍູ້ວຽກງານຢູ່ພະແນກ ປທສ ແຂວງໄຊຍະບູລີ. ໂດຍໃຫ້ກຽດຕ້ອນຮັບຂອງພະແນກ ປທສ ແຂວງ ຢ່າງອົບອຸ່ນ.

       ທ່ານ ອິນສະຫວັນ ພົມປັນຍາ ຫົວໜ້າພະແນກ ປທສ ແຂວງ ໄດ້ສະຫຼຸບລາຍງານສະພາບໂດຍລວມໃນການຈັດຕັ້ງປະຕິບັດແຜນພັດທະນາ ປະຈໍາປີ 2019 ແລະ ທິດທາງແຜນການປີ 2020. ຊຶ່ງໃນໄລຍະ 01 ປີຜ່ານມາສາມາດຍາດໄດ້ຜົນສໍາເລັດທີ່ພົ່ນເດັ່ນຫຼາຍດ້ານເປັນຕົ້ນ: ດ້ານການຈັດຕັ້ງ - ບໍລິຫານ ແລະ ພັດທະນາບຸກຄະລາກອນ ແລະ ກວດກາ, ການຂະຫຍາຍ​ຕາໜ່າງ ​ດ້ານໂທລະ​ຄົມມະນາຄົມ ຂອງບັນດາສາຂາບໍລິສັດ, ດ້ານວຽກງານ ໄປສະນີ ແລະ ດັດສົມໂທລະຄົມ, ວຽກ​ງານ ​ເຕັກ​ໂນ​ໂລ​ຊີການ​ສື່ສານຂໍ້​ມູນ​ຂ່າວ​ສ່າ​ນ, ວຽກງານບໍລິຫານລັດດ້ວຍເອເລັກໂຕຣນິກ, ວຽກງານຄຸ້ມຄອງໂທລະຄົມມະນາຄົມ ແລະ ຄື້ນຄວາມຖີ່,  ພ້ອມນີ້, ຍັງໄດ້ລາຍງານບາງບັນຫາທີ່ຍັງເປັນສິ່ງທ້າທາຍ ເພື່ອສະເໜີຂໍທິດຊີ້ນຳ ແລະ ຫາວິທີທາງແກ້ໄຂໃຫ້ທັນກັບສະພາບການ.

       ໃນໂອກາດນີ້, ທ່ານຮອງລັດຖະມົນຕີ ໄດ້ໃຫ້ທິດຊີ້ນໍາ ແລະ ໂອ້ລົມຕໍ່ພະແນກ ປທສ ແຂວງ. ຊຶ່ງກ່ອນອຶ່ນໝົດ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຍາດມາໄດ້ໃນ​ໄລຍະຜ່ານມາ ເປັນຕົ້ນ: ດ້ານວຽກງານ ບໍລິຫານ ແລະ ພັດທະນາບຸກຄະລາກອນ, ດ້ານວຽກງານ ໄອຊີທີ, ວຽກງານບໍລິຫານລັດດ້ວຍເອເລັກໂຕຣນິກ ແລະ ວຽກງານທີ່ກ່ຽວຂ້ອງ ທີ່ສາມາດສ້າງ​ລາຍ​ຮັບ ແລະ ມອບພັນທະໃຫ້ລັດ​ໄດ້​ຫຼາຍ​ພໍສົມຄວນ. ຄຽງຄູ່ກັນນັ້ນ, ກໍ່ຕ້ອງໄດ້ສືບຕໍ່ເຜີຍແຜ່ເຊື່ອມຊືມ ບັນດາເອກະສານ, ນິຕິກຳຕ່າງໆ ທີ່ພົວພັນກັບ ວຽກງານ ປທສ ໃຫ້ສັງຄົມໄດ້ຮັບຮູ້ ແລະ ເຂົ້າໃຈ, ເອົາໃຈໃສ່ ປັບປຸງກົງຈັກການຈັດຕັ້ງ ໃຫ້ກະທັດ​ຮັດ,​ ຖືກຕ້ອງ ​ແລະ ສອດຄ່ອງ ກັບ​ຄວາມເປັນຈິງ, ສຶບຕໍ່ພັດທະນາພື້ນຖານໂຄງລ່າງ ຫຼື ຕາໜ່າງດ້ານໄປສະນີ, ໂທລະຄົມມະນາຄົມ ໃຫ້ວ່ອງໄວທົ່ວເຖິງຕາມທິດຫັນເປັນທັນສະໄໝ. ພ້ອມທັງ ສ້າງຄວາມຮັບຮູ້ ແລະ ສົ່ງເສີມ ການຫັນເປັນທັນສະໄໝໃນການຊຳລະສະສາງ ແລະ ການເກັບລາຍຮັບເຂົ້າງົບປະມານ ຜ່ານລະບົບໂທລະສັບມືຖື (Mobile Money) ຕາມທິດຊີ້ນໍາຂອງລັດຖະບານ ໃຫ້ບັນລຸຜົນສໍາເລັດ ແລະ ໄດ້ຮັບການຈັດຕັ້ງປະຕິບັດໂດຍໄວ.

          ຂ່າວ: ຫ້ອງການ, ພະແນກເລຂານຸການ-ພິທີການ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2018
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາລະສານ ໄອຊີທີ ສະບັບທີ 14
ລະ​ບົບ​ຂື້ນ​ທະ​ບຽນ​ປະ​ຊຸມ