ກະຊວງ ປທສ ຮ່ວມ ເປີດກອງປະຊຸມສຳມະນາ ການຮ່ວມມືດ້ານມາດຕະຖານດ້ານເສດຖະກິດດິຈິຕອນ ສປ ຈີນ - ອາຊຽນ

21/10/2020

ກະຊວງ ປທສ ຮ່ວມ ເປີດກອງປະຊຸມສຳມະນາ ການຮ່ວມມືດ້ານມາດຕະຖານດ້ານເສດຖະກິດດິຈິຕອນ ສປ ຈີນ - ອາຊຽນ

         ໃນວັນທີ 20 ຕຸ​ລານີ້, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ແລະ ກະຊວງອຸດສາຫະກຳ ແລະ ເຕັກໂນໂລຊີຂໍ້ມູນຂ່າວສານ (MIIT), ສປ. ຈີນ ໄດ້ຮ່ວມກັນ ເປີດ ໃນກອງປະຊຸມສຳມະນາ ການຮ່ວມມືດ້ານມາດຕະຖານດ້ານເສດຖະກິດດິຈິຕອນ ສ​ປ ຈີນ - ອາຊຽນ (China-ASEAN Digital Economy Standardization Cooperation) ຜ່ານລະບົບກອງປະຊຸມທາງໄກ.  ການເຂົ້າຮ່ວມຄັ້ງນີ້ ມີບັນດາບັນດາກະຊວງ ທີ່ຮັບຜິດຊອບວຽກງານ ດິຈິຕອນ ຫຼື ໄອຊິທີ ໃນອາຊຽນ, ກອງເລຂາອາຊຽນ ແລະ ບັນດາຕາງໜ້າບໍລິສັດ ຂອງອາຊຽນ ແລະ ສປ ຈີນ. ຝ່າຍ ສປປ ລາວ ກ່າວເປີດໂດຍ ທ່ານ ນ. ພາ​ວັນ​ນາ ດວງບຸບ​ຜາ, ຮອງຫົວໜ້າກົມແຜນການ ແລະ ການຮ່ວມມື, ກະຊວງ ປ ແລະ ຝ່າຍ ສປ ຈີນ ໂດຍ ທ່ານ ຟານ ສູຈ່ຽນ (Fan Shujian), ຮອງຫົວໜ້າກົມ ວິທະຍາສາດ ແລະ ເຕັກໂນໂລຊີ, (MIIT) ແລະ ທ່ານ ນ. ​ຫວັງ ຈີຊິນ (Wang Zhiqin), ຮອງ​ປະ​ທານ ສະ​ຖາ​ບັນ​ເຕັກ​ໂນ​ໂລ​ຊີ ການ​ສື່​ສານ ແລະ ຂໍ້​ມູນ​ຂ່າວ​ສານ ແຫ່ງ ສ​ປ. ຈີນ.  

         ກອງປະຊຸມສຳມະນາໃນຄັ້ງນີ້ແມ່ນການຜັນຂະຫຍາຍ ຜົນຂອງກອງປະຊຸມ TELMIN19 ທີ່ ສປປ ລາວ ເປັນເຈົ້າພາບ ໃນເດືອນ ຕຸລາ 2019 ຜ່ານມາ, ລັດຖະມົນຕີອາຊຽນດິຈິຕອນ + ສປ ຈີນ ໄດ້ຮັບຮອງເອົາປີ 2020 ເປັນ ປີແຫ່ງການຮ່ວມມືເສດຖະກິດ ດິຈິຕອນ ອາຊຽນ-ສປ ຈີນ. ຊື່ງກອງ​ປະ​ຊຸມ​ສຳ​ມະ​ນາ​ຄັ້ງ​ນີ້ ເປັນໜື່ງໃນ ກິດຈະກຳ ເພື່ອສົ່ງເສີມການຮ່ວມມື ແລະ ສະໜັບສະໜູນການພັດທະນາດິຈິຕອນຂອງ ອາຊຽນ ແລະ ສປ ຈີນ ທາງດ້ານດິຈິຕອນ. ພ້ອມດຽວກັນນັ້ນ ຍັງເປັນການຈັດຕັ້ງປະຕິບັດ ແຜນການຮ່ວມມື ເສດຖະກິດ ດິຈິຕອນ ອາຊຽນ-ສປ ຈີນ ທີ່ໄດ້ມີພິທີເປີດ ໃນວັນ​ທີ 12 ມິ​ຖຸ​ນາ 2020 ຜ່ານມາ ໂດຍ ທ່ານ ປອ ທັນສະໄໝ ກົມມະສິດ, ລມຕ ກະຊວງ ປທສ (ໃນນາມປະທານ ລມຕ ດິຈິຕອນ ອາຊຽນ) ແລະ ທ່ານ ມ້ຽວ ເຫວີຍ (MIAO WEI) ລັດຖະມົນຕີ ກະຊວງ ອຸດສະຫະກໍາ ແລະ ໄອຊີທີ ຂອງ ສປ ຈີນ.

          ສຳລັບ ສປປ ລາວ ຖືເປັນກາລະໂອກາດ ອັນດີ ທີ່ພວກເຮົາຈະໄດ້ສຶກສາ, ຖອດຖອນບົດຮຽນນຳ ສປ ຈີນ ແລະ ບັນດາປະເທດ ໃນອາຊຽນ, ຊຶ່ງປະຈວບເໝາະກັບ ທິດທາງແຜນການຂອງລັດຖະບານ ໃນການເຫັນດີດ້ານຫຼັກການ ຮັບຮອງເອົາແຜນແມ່ບົດເສດຖະກິດ ດິຈິຕອນ ແຫ່ງຊາດ 5 ປີ (2021-2025). ໂດຍເສດຖະກິດດິຈິຕອນ ແມ່ນເສດຖະກິດຮູບແບບໃໝ່ ບົດພື້ນຖານ ທີ່ການນຳໃຊ້ເຕັກໂນໂລຊີ ດິຈິຕອນ ທີ່ໄດ້ຖືກຮັບຮອງໃນກອງປະຊຸມ ລັດຖະບານ ສະໄໝສາມັນ ປະຈຳເດືອນກັນຍາ 2020 ໄດ້ມອບໃຫ້ ກະຊວງ ປທສ ເປັນໃຈກາງ ປະສານສົມທົບກັບ ພາກສ່ວນກ່ຽວຂ້ອງປັບປຸງຄືນ ເນື້ອໃນ ແລະ ກວດກາຄືນບັນດານິຕິກຳ ທີ່ໄດ້ປະກາດໃຊ້ໃນໄລຍະຜ່ານມາ ເພື່ອໃຫ້ ສອດຄ່ອງ. ບາງຫົວຂໍ້ທີ່ໄດ້ ຍົກຂຶ້ນມາສົນທະນາ ໃນນາມ ວິຊາການປະກອບມີ: ການຫັນເປັນດິຈິຕອນ ແລະ ເສດຖະກິດດິຈິຕອນ ທີ່​ໝັ້ນ​ຄົງເທື່ອລະກ້າວ, ການວິເຄາະຜົນໄດ້ຮັບຈາກພື້ນຖານໂຄງລ່າງລະບົບໄອຊີທີ ແລະ ອິນເຕີເນັດຄວາມໄວສູງ ຕໍ່ເສດຖະກິດດິຈິຕອນ, ເຕັກໂນໂລຊີການສື່ສານແບບຊານສະຫຼາດໃນຍຸກສະໄໝໃໝ່, ບັນດາມາດຕະຖານ ແລະ ຫຼັກການໃນສາກົນ ສຳລັບການຫັນປ່ຽນເປັນດິຈິຕອນ, ການພັດທະນາ ແລະ ຫຼັກການສາກົນ ສຳລັບແອັບພລິເຄຊັນ ແລະ ເຕັກໂນໂລຊີອຸປະກອນເກັບກຳພາບ, ວິວັດທະນາການຂອງເຄືອຂ່າຍທີ່​ທັນ​ສະ​ໄໝ  ແລະ ລາຍ​ງານ​ການ​ສຶກ​ສາ​ວິ​ໃຈ​ກ່ຽວ​ກັບເຕັກ​ໂນ​ໂລ​ຊີການສື່ສານ​ ຈາກ​​ໜ່ວຍ​ງານ​ ຂອງອົງ​ການ ໂທ​ລະ​ຄົມ​ມະ​ນາ​ຄົມ​ສາ​ກົນ ຫຼື ITU.

           ສໍາລັບທິດທາງແຜນການໃນຕໍ່ໜ້າ, ສປ ຈີນ ແລະ ອາຊຽນ ຈະນຳເອົາຜົນຂອງການປຶກສາຫາລືໃນຄັ້ງນີ້ ​ສະ​ເໜີ​ທິດ​ທາງ ແລະ ລາຍ​ງານ​ເຈົ້າ​ໜ້າ​ທີ່​ອາ​ວຸ​ໂສດິ​ຈິ​ຕອນ​ອາ​ຊຽນ (ADGSOM) ແລະ ​ລັດ​ຖະ​ມົນ​ຕີດິ​ຈິ​ຕອນ​ອາ​ຊຽນ (ADGMIN) ເພື່ອສຶບຕໍ່ຮ່ວມກັນຄົ້ນຄວ້າເນື້ອໃນ ແລະ ແຜນການ ເພື່ອນຳໄປຜັນຂະຫຍາຍ ການຮ່ວມມື ທາງດ້ານ ເສດຖະກິດດິຈິຕອນ ໃຫ້ປະກົດຜົນເປັນຈິງໃນຕໍ່ໜ້າ ບົນພື້ນຖານຄວາມເປັນເອກະພາບ ໃນອາຊຽນ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ.

         ຂ່າວໂດຍ:  ກົມແຜນການ ແລະ ການຮ່ວມມື ຮ່ວມ​ກັບ ສູນ​ອິນ​ເຕີ​ເນັດ​ແຫ່ງ​ຊາດ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ