ກອງປະຊຸມເວທີເສວະນາ ປຶກສາຫາລືກ່ຽວກັບ ການຮ່ວມມືພາກລັດ - ພາກເອກະຊົນ ໃນການຮັບມືກັບພະຍາດ COVID-19

22/10/2020

ກອງປະຊຸມເວທີເສວະນາ ປຶກສາຫາລືກ່ຽວກັບ ການຮ່ວມມືພາກລັດ - ພາກເອກະຊົນ ໃນການຮັບມືກັບພະຍາດ COVID-19

       ໃນວັນທີ 22 ຕຸ​ລາ 2020, ເຈົ້າ​ໜ້າ​ທີ່​ອາ​ວຸ​ໂສ​ດິ​ຈິ​ຕອນອາຊຽນ ແລະ ສປ. ຈີນ ໄດ້ຮ່ວມກັນ ຈັດກອງປະຊຸມ ໃນຫົວ​ຂໍ້ “ກອງປະຊຸມເວທີເສວະ​ນາ ປຶກສາຫາລືກ່ຽວກັບ ການຮ່ວມມືພາກລັດ - ພາກເອກະຊົນ​ໃນ​ການຮັບ​ມື​ກັບ​ພະ​ຍາດ COVID-19 ​ແບບ​ ດິ​ຈິ​ຕອນ” (ASEAN-China Public Private Cooperation Forum on Combating COVID-19 Digitally) ຜ່ານລະບົບກອງ​ປະ​ຊຸມທາງໄກຂຶ້ນ. ໂດຍການເປັນປະທານຮ່ວມຂອງ ທ່ານ ນາງ Yang Yuyan, ຮອງຫົວ​ໜ້າ​​ກົມ​ພັດ​ທະ​ນາເຕັກ​ໂນ​ໂລ​ຊີ ​ຂໍ້​ມູນ​ຂ່າວ​ສານ, ກະຊວງ ອຸດສະຫະກໍາ ແລະ ໄອຊີທີ ຂອງ ສປ ຈີນ.  (Deputy Director General of the Department of Information Technological Development of Ministry of Industry and Information Technology (DITD, MIIT)) ແລະ ທ່ານ ນາງ ພາ​ວັນ​ນາ ດວງ​ບຸບ​ຜາ, ຮອງ​ຫົວ​ໜ້າ​ກົມ​ແຜນ​ການ ແລະ ການ​ຮ່ວມ​ມື, ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ຕາງ​ໜ້າເຈົ້າ​ໜ້າ​ທີ່​ອາ​ວຸ​ໂສ ດິຈິຕອນອາ​ຊຽນ ຂອງ ສປປ ລາວ, ພ້ອມ​ດ້ວຍ ທ່ານ ນາງ Li Sa ຫົວ​ໜ້າ​ພະ​ແນກ​ການ​ຄ້າ ແລະ ການ​ລົງ​ທຶນ ສູນ​ອາ​ຊຽນ- ຈີນ ມີບັນດາ ເຈົ້າ​ໜ້າ​ທີ່​ອາ​ວຸ​ໂສ ດິຈິຕອນອາ​ຊຽນ, ກອງເລຂາອາຊຽນ ແລະ ບັນດາຜູ້​ປະ​ກອບ​ການ​ພາກ​ລັດ-ເອ​ກະ​ຊົນ ແລະ ກົມກ່ຽວຂ້ອງເຂົ້າຮ່ວມ.

        ທ່ານ ນາງ Yang Yuyan ໄດ້ກ່າວມີຄໍາເຫັນ, ຊຶ່ງກ່ອນອຶ່ນໝົດທ່ານໄດ້ສະແດງຄວາມຊົມເຊີຍ ຕໍ່ການ​ຮ່ວມ​ມື ອາ​ຊຽນ-ສປ ຈີນ ໃນນາມເຈົ້າພາບ ທີ່ໄດ້ເອົາໃຈໃສ່ ໃຫ້ກອງ​ປະ​ຊຸມນີ້ໄດ້ເກີດຂື້ນ ​ທ່າມກາງສະພາບອັນຫຍຸ້ງຍາກ, ໄດ້ທົບທວນຄືນ ອີງຕາມຜົນຂອງກອງປະຊຸມ TELMIN19 ທີ່ ສປປ ລາວ ເປັນເຈົ້າພາບ ໃນເດືອນ ຕຸລາ 2019 ຜ່ານມາ, ​ຊຶ່ງລັດຖະມົນຕີອາຊຽນດິຈິຕອນ+ ສປຈີນ ໄດ້ຮັບຮອງເອົາປີ 2020 ເປັນ ປີແຫ່ງການຮ່ວມມືເສດຖະກິດ ດິຈິຕອນ ອາຊຽນ-ສປ ຈີນ ທີ່ເປັນໜື່ງໃນ ກິດຈະກຳ ເພື່ອສົ່ງເສີມການຮ່ວມມື ແລະ ສະໜັບສະໜູນການພັດທະນາດິຈິຕອນຂອງ ອາຊຽນ ແລະ ສປ. ຈີນ ​ຮ່ວມ​ກັນ​ບົນ​ພື້ນ​ຖານ ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍດ ແລະ ສົ່ງ​ເສີມ​ການ​ຮ່ວມ​ມື ທີ່​ດີ.

       ການຈັດປະ​ຊຸມ​ໃນ​ຄັ້ງ​ນີ້ ​ກໍ່ເພື່ອປືກສາຫາລື, ແລກປ່ຽນຂໍ້​ມູນ ເພື່ອການພັດທະນາ ໃນ 3 ວຽກຫລັກ ຄື: (1) ການ​ນຳ​ໃຊ້​ເຕັກ​ໂນ​ໂລ​ຊີ​ດິ​ຈິ​ຕອນ ໃນ​ການ​ປ້ອງ​ກັນ ແລະ ຕໍ່​ຕ້ານ​ພະ​ຍາດ​ລະ​ບາດ​ຕ່າງໆ, (2) ​​ການສົ່ງ​ເສີມ​ການ​ລົງ​ທຶນ ແລະ ການ​ຮ່ວມ​ມື ໃນ​ຂອບເສດ​ຖະ​ກິດ​ດິ​ຈິ​ຕອນ ແລະ (3) ​​ວຽກຮ່ວມ​ມື​ພາກ​ພື້ນ​ໃນ​ການ​ຕໍ່​ຕ້ານ​ພະ​ຍາດ ໂຄວິດ-19 ແລະ ສົ່ງ​ເສີມ​ການ​ພັດ​ທະ​ນາເສດ​ຖະ​ກິດ​ດິ​ຈິ​ຕອນ.       ສໍາລັບທິດທາງໃນຕໍ່ໜ້າ, ກໍ່ຈະສືບຕໍ່ແລກປ່ຽນຂໍ້ມູນ-ຂ່າວສານ, ປະສົບການ ແລະ ບົດຮຽນທີ່ດີໃນການນໍາໃຊ້ໄອຊີທີ ເພື່ອເຝົ້າລະວັງ, ສະກັດກັ້ນ ແລະ ຮັບມືກັບພະຍາດ ໂຄວິດ-19 ແລະ ສືບຕໍ່ ພ້ອມ​ຮັບ​ມື​ບັນ​ດາ​ສະ​ພາບ​ການ ທີ່​ຄາດ​ບໍ່​ເຖິງ​ໃນ​ອະ​ນາ​ຄົດ.

      ຂ່າວໂດຍ: ກົມແຜນການ ແລະ ການຮ່ວມມື.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 15
ລະ​ບົບ​ຂື້ນ​ທະ​ບຽນ​ປະ​ຊຸມ