ສະຫະພັນແມ່ຍິງກະຊວງ ຕສ ສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 66 ປີ

26/07/2021

ສະຫະພັນແມ່ຍິງກະຊວງ ຕສ ສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 66 ປີ

         ໃນຕອນເຊົ້້າຂອງວັນທີ 23 ກໍລະກົດ 2021 ນີ້, ທີ່ສໍານັກງານໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ, ສະຫະພັນແມ່ຍິງກະຊວງ ເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມເຜີຍແຜ່ການນຳໃຊ້ແອັບພລິເຄຊັນ “ລາວ ສູ້ສູ້” ຜ່ານລະບົບໂປຣແກຣມ LaoKYC ແລະ ແລກປ່ຽນບົດຮຽນໃນການສ້າງເສດຖະ ກິດຄອບຄົວໃນຊ່ວງວິກິດ ການແຜ່ລະບາດຂອງພະຍາດໂຄວິດ-19 ເນື່ອງໃນໂອກາດ​ສະ​ເຫຼີມ​ສະຫຼອງວັນ​ສ້າງ​ຕັ້ງອົງການຈັດຕັ້ງ​ສະ​ຫະ​ພັນ​ແມ່​ຍິງ​ລາວ ຄົບ​ຮອບ 66 ປີ (20 ກໍລະກົດ 1955-20 ກໍລະກົດ 2021). ໃຫ້ກຽດເປັນປະທານຄັງນີ້ໂດຍ ສະຫາຍ ບັນດິດ ສຈ ບໍ່ວຽງຄໍາ ວົງດາລາ ກໍາມະການສູນກາງພັກ, ເລຂາຄະນະພັກ,  ລັດຖະ ມົນຕີກະຊວງ ເຕັກໂນໂລຊີ ແລະ ການສື່ສານ (ກຕສ), ມີຄະນະໜ່ວຍພັກ, ຄະນະພັກຮາກຖານ ບັນດາກົມ/ທຽບເທົ່າ, ບໍລິສັດລັດວິສາຫະກິດ, ອົງການຈັດຕັ້ງມະຫາຊົນຂັ້ນກະຊວງ, ຄະນະບໍລິຫານງານສະຫະພັນແມ່ຍິງ, ແຂກຖືກເຊີນ ແລະ ສະມາຊິກສະມາຊິກສະຫະພັນແມ່ຍິງ ອ້ອມຂ້າງກະຊວງເຂົ້າຮ່ວມ.

        ທ່ານ ນ. ເກສອນ ສຸລິວົງ ປະທານສະຫະພັນແມ່ຍິງກະຊວງ ຕສ ໄດ້ຂຶ້ນລາຍງານການເຄື່ອນໄຫວວຽກງານທີ່ພົ້ນເດັ່ນໄລຍະຜ່ານມາ ເປັນຕົ້ນ: ການປະຕິບັດພາລະບົດບາດເຕົ້າໂຮມຄວາມສາມັກຄີ, ປຸກລະດົມຊຸກຍູ້ແມ່ຍິງເຂົ້າຮ່ວມປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ, ເປັນເຈົ້າການປະຕິບັດແຜນພັດທະນາແມ່ຍິງລາວແຕ່ລະໄລຍະ, ນໍາພາຂະບວນການແມ່ຍິງປະຕິບັດຄໍາຂວັນ, ຂໍ້ແຂ່ງຂັນ ຕິດພັນກັບຂະບວນແຂ່ງຂັນຮັກຊາດ ແລະ ພັດທະນາ. ພ້ອມນີ້ ກໍໄດ້ເອົາໃຈໃສ່ສຶກສາອົບຮົມຄຸນລັກສະນະທີ່ເປັນມູນເຊື້ອຂອງເອື້ອຍນ້ອງແມ່ຍິງ, ປະເພນີອັນດີງາມຂອງຊາດ, ຂອງເຜົ່າ, ປຸກລະດົມແມ່ຍິງເຂົ້າຮ່ວມຢ່າງຕັ້ງໜ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ເວົ້າລວມ ເວົ້າສະເພາະການພັດທະນາແມ່ຍິງໃນທຸກດ້ານ ໂດຍສະເພາະ ການສຶກສາສຶກອົບຮົມການເມືອງ-ແນວຄິດດ້ວຍຫຼາຍວິທີ, ຫຼາຍຮູບແບບ, ເປັນເຈົ້າການເຜີຍແຜ່ລະບຽບ ແລະ ເຊື່ອມຊຶມບັນດາເອກະສານສໍາຄັນຕ່າງໆ, ນິຕິກໍາ, ກົດໝາຍໃຫ້ແກ່ເອື້ອຍນ້ອງແມ່ຍິງ.

        ໃນໂອກາດນີ້, ສະຫາຍ ບັນດິດ ສຈ ບໍ່ວຽງຄໍາ ວົງດາລາ ໄດ້ມີຄໍາເຫັນ ແລະ ໂອ້ລົມຕໍ່ກອງປະຊຸມ ກ່ອນ ອຶ່ນໝົດ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວຂອງສະຫະພັນແມ່ຍິງ ທີ່ສາມາດເຮັດໄດ້ຜົນສໍາເລັດຫຼາຍຢ່າງ ແລະ ມີບາດກ້າວຂະຫຍາຍຕົວຢ່າງຕໍ່ເນື່ອງ, ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ. ພ້ອມນັ້ນ, ໄດ້ປະກອບສ່ວນທາງດ້ານສະຕິປັນຍາ, ຄວາມຮູ້ຄວາມສາມາດ ຕະຫຼອດຮອດການເສຍສະຫຼະເວລາໃນການປະກອບສ່ວນທຸກຂະບວນການວຽກງານ ຄຽງບ່າຄຽງໄຫຼ່ກັບອ້າຍນ້ອງຊາຍຢ່າງຕັ້ງໜ້າ, ປະຕິບັດທຸກວຽກງານທີ່ໄດ້ຮັບມອບໝາຍສໍາເລັດຕາມແຜນການທີ່ວາງໄວ້ ແລະ ຮັກສາໄດ້ຄວາມສາມັກຄີພາຍໃນພາຍນອກ. ພ້ອມນີ້ ສະຫາຍ ຍັງໄດ້ເນັ້ນໜັກໃຫ້ເອື້ອຍນ້ອງແມ່ຍິງ ເພິ່ມທະວີຄວາມເອົາໃຈໃສ່ໃນການພັດທະນາຕົນເອງທາງດ້ານວຽກງານເຕັກໂນໂລຊີ ແລະ ການ. ພ້ອມທັງ ຍົກລະດັບຄວາມຮູ້ຄວາມສາມາດທາງດ້ານຕ່າງໆເຊັ່ນ: ຍົກລະດັບດ້ານວິຊາສະເພາະ ແລະ ພາສາຕ່າງປະເທດ ເພື່ອພັດທະນາຕົນເອງໃຫ້ ສາມາດຮອງຮັບ ການປ່ຽນແປງໃໝ່ຂອງເສດຖະກິດ-ສັງຄົມໃນພາກພື້ນ ແລະ ສາກົນ.

          ດັ່ງທີ່ພວກເຮົາໄດ້ຮັບຮູ້ນໍາກັນວ່າການລະບາດຂອງພະຍາດໂຄວິດ-19 ໃນທົ່ວໂລກ ກໍຄື ສປປລາວ ໄດ້ສ້າງຜົນກະທົບຢ່າງໃຫຍ່ຫຼວງໃນທຸກດ້ານ ບໍ່ວ່າຈະເປັນດ້ານການດໍາລົງຊີວິດ ແລະ ດ້ານເສດຖະກິດ-ສັງຄົມ. ດັ່ງນັ້ນ, ສະຫະພັນແມ່ຍິງກະຊວງ ຕສ ຈຶ່ງໄດ້ນໍາເອົາ 2 ຫົວຂໍ້ສຳຄັນມາເຜີຍແຜ່ ກໍ່ຄື: ການນຳໃຊ້ແອັບພລິເຄຊັນ “ລາວ ສູ້ສູ້” ໂດຍ ທ່ານ ປອ ທະວີສັກ ມະໂນທໍາ ຫົວໜ້າສູນບໍລິຫານລັດດ້ວຍເອເລັກໂຕຣນິກ, ກຕສ ແລະ ແລກປ່ຽນບົດຮຽນການສ້າງເສດຖະກິດຄອບຄົວ ໃນໄລຍະໂຄວິດ 19 ໂດຍຕາງຫນ້າຈາກຫນ່ວຍຮາກຖານແມ່ຍິງ ບໍລິສັດລາວໂທລະຄົມມະນາຄົມ. ແອັບພລິເຄຊັນ “ລາວ ສູ້ໆ” ແມ່ນອີກຫນຶ່ງບາດກ້າວສຳຄັນ ຂອງການນຳໃຊ້ຮູບແບບການຫັນເປັນທັນສະໄໝໃນຍຸກການເຕີບໃຫຍ່ຂະຫຍາຍຕົວທາງດ້ານເຕັກໂນໂລຊີ ທີ່ຊ່ວຍໃຫ້ວຽກງານສາທາລະນະສຸກ ກໍ່ຄືແພດໝໍ ແລະ ປະຊາຊົນ ສາມາດຕິດຕາມ, ສອບຖາມ ຫລື ລົງທະບຽນຮັບວັກຊີນປ້ອງກັນໂຄວິດໃຫ້ງ່າຍຂື້ນ ແລະ ແທດເຫມາະກັບສະພາບການໃນປະຈຸບັນ ທີ່ມີການແຜ່ເຊື້ອພະຍາດຂອງພະຍາດ ໂຄວິດ-19 ແບບວົງກວ້າງຢູ່ ສປປ ລາວ.

             ຂ່າວ: ຄະນະສະຫະພັນແມ່ຍິງກະຊວງ ຕສ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ