ກອງປະຊຸມສໍາມະນາແລກປ່ຽນບົດຮຽນດ້ານໄອຊີທີ ລະຫວ່າງ ສປປ ລາວ ແລະ ສ. ເກົາຫຼີ

02/11/2021

ກອງປະຊຸມສໍາມະນາແລກປ່ຽນບົດຮຽນດ້ານໄອຊີທີ ລະຫວ່າງ ສປປ ລາວ ແລະ ສ. ເກົາຫຼີ

       ສູນບໍລິຫານລັດດ້ວຍເອເລັກໂຕຣນິກ (ສລອ), ກະຊວງ ເຕັກໂນໂລຊີ ແລະ ການສື່ສານ (ກສຕ) ໄດ້ຈັດກອງປະຊຸມ​ສໍາມະນາ ກ່ຽວກັບ ການແລກປ່ຽນບົດຮຽນດ້ານໄອຊີທີ ຮ່ວມກັບ ອົງການ National Information Society Agency (NIA), ສ. ເກົາຫຼີ. ໃນຫົວຂໍ້ “ຍຸດທະສາດການພັດທະນາເສດຖະກິດ-ສັງຄົມ ແບບດີຈີຕອນ  (Strategies for Socio-Economic Development Through Digital Transformation in Lao PDR)”ຂຶ້ນ ໃນວັນທີ 26 ຕຸລາ 2021 ຜ່ານມານີ້, ທີ່ໂຮງແຮມ ລາວພລາຊ່າ, ນະຄອນຫຼວງວຽງຈັນ, ຜ່ານລະບົບກອງປະຊຸມທາງໄກ. ໂດຍການເປັນປະທານຮ່ວມຂອງ ທ່ານ ປອ. ທະວີສັກ ມະໂນທັມ, ຫົວໜ້າສູນບໍລິຫານລັດດ້ວຍເອເລັກໂຕຣນິກ, ກະຊວງ ຕສ ແລະ ທ່ານ  ແຈໂຮ ລີ (Jaeho Lee) ຮອງປະທານ ຂອງອົງການ NIA  ມີຕາງໜ້າຈາກ ບັນດາກົມ/ທຽບເທົ່າ ພາຍໃນກະຊວງ ຕສ, ອົງການ Korea International Cooperation Agency (KOICA), ອົງການໄອຍະການປະຊາຊົນສູງສຸດ, ຕາງໜ້າຈາກ 09 ກະຊວງທີ່ກ່ຽວຂ້ອງ ແລະ ຈາກ ສ. ເກົາຫຼີ ເຂົ້າຮ່ວມ.

       ການຈັດກອງປະຊຸມສຳມະນາໃນຄັ້ງນີ້ ແມ່ນເພື່ອຮຽນຮູ້, ຖອດຖອນບົດຮຽນ ແລະ ປະສົບການ ຂອງ ສ. ເກົາຫຼີ  ໃນການການຄົ້ນຄວ້າວິໄຈ ການຫັນເປັນດີຈີຕອນ. ເຊິ່ງປະກອບມີບັນດາຫົວຂໍ້ທີ່ໜ້າສົນໃຈ ເປັນຕົ້ນເຊັ່ນ: (1)ການພັດທະ ນາ Intelligent Government ໂດຍນຳໃຊ້ເຕັກໂນໂລຊີ AI, Big Data, IoT, (2)ການບໍລິການພາກລັດແບບດີຈີຕອນ (Digital Government Service: Government 24), (3)ການບໍລິການພາກລັດແບບດິຈິຕອນ ອັດສະລິຍະ (Digital Government Service: D-Brain) ແລະ (4)ບົດຮຽນການຫັນລະບົບໄອຍະການສານ ເປັນດີຈີຕອນ (Digital Transformation of OSPP).

       ທ່ານ ປອ. ທະວີສັກ ມະໂນທັມ ໄດ້ກ່າວວ່າ: ການພັດທະນາ ເສດຖະກິດ-ສັງຄົມ ແບບດີຈີຕອນ ແມ່ນໜຶ່ງໃນແຜນບູລິມະສິດຂອງລັດຖະບານ ແຫ່ງ ສປປ ລາວ, ຊຶ່ງຈຳເປັນຕ້ອງໄດ້ນຳໃຊ້ ເຕັກໂນໂລຊີດີຈີຕອນທີ່ທັນສະໄໝ ເຂົ້າມາຊ່ວຍ ເປັນໂຕຂັບເຄື່ອນ ທາງດ້ານເສດຖະກິດ-ສັງຄົມ ຄຽງຄູ່ກັນນັ້ນ, ກໍ່ຕ້ອງໄດ້ມີຍຸດທະສາດ ທີ່ດີ ເພື່ອໃຊ້ໃນການສ້າງແຜນການ, ແຜນງານ ໃນການຫັນເປັນທັນສະໄໝ ແບບດີຈີຕອນ ເທື່ອລະກ້າວ.

          ໂດຍ: ສູນບໍລິຫານລັດດ້ວຍເອເລັກໂຕຣນິກ, ພະແນກນະໂຍບາຍ ແຜນການ ແລະ ການຮ່ວມມື.

          ກວດແກ້: ຫ້ອງການກະຊວງ.

 

ສະຖິຕິຂະແໜງ ໄປສະນີ, ໂທລະຄົມມະນາຄົມ ແລະ ການສື່ສານ ປີ2019
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບລ່າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ