ບໍລິສັດ ໄປສະນີ ຫວຽດນາມ ແລະ ບໍລິສັດ ລັດວິສາຫະກິດ ໄປສະນີລາວ ຮ່ວມລົງນາມບົດບັນທຶກຄວາມເຂົ້າໃຈ

24/06/2022

ບໍລິສັດ ໄປສະນີ ຫວຽດນາມ ແລະ ບໍລິສັດ ລັດວິສາຫະກິດ ໄປສະນີລາວ ຮ່ວມລົງນາມບົດບັນທຶກຄວາມເຂົ້າໃຈ

          ໃນຕອນ​ບ່າຍ​ວັນ​ທີ 10 ມິຖຸນາ 2022 ຜ່ານມາ, ທີ່​ນະຄອນຮ່າ​ໂນ້ຍ, ສ.ສ ຫວຽດນາມ ໄດ້ມີພິທີ​ລົງ​ນາມ​ໃນ​ບົດ​ບັນທຶກ​ຄວາມເຂົ້າໃຈ (MOU) ກ່ຽວ​ກັບ ການ​ຮ່ວມ​ມື​ດ້ານ​ໄປສະນີ​ ລະຫວ່າງ ບໍ​ລິ​ສັດ ​ໄປສະນີ ​ຫວຽດນາມ ​ແລະ ລັດວິສາຫະກິດ ໄປສະນີ​ລາວ ໃຫ້ກຽດເຂົ້າຮ່ວມໂດຍທ່ານ ຫງວຽນ ​ແມ້ງ ​ຮຸ່ງ, ​ລັດຖະມົນຕີ​ກະຊວງ​ຖະ​ແຫຼ​ງຂ່າວ ​ແລະ ການສື່ສານ ສ.ສ ຫວຽດນາມ ທ່ານ ບັນດິດ ສຈ. ບໍ່​ວຽງ​ຄໍໍາ ວົງ​ດາລາ, ລັດຖະມົນຕີ​ກະຊວງ​ເຕັກ​ໂນ​ໂລ​ຊີ ​ແລະ ການສື່ສານ​ ສປປ ລາວ.

        ໃນບົດບັນທຶກຄວາມເຂົ້າໃຈ ລະຫວ່າງ ບໍລິສັດ ໄປສະນີຫວຽດນາມ ແລະ ບໍລິສັດ ລັດວິສາຫະກິດ ໄປສະນີລາວ ມີຈຸດປະສົງສຳຄັນ ຄື: 1) ເພື່ອສົ່ງເສີມການຮ່ວມມືສອງຝ່າຍໃນຂະແໜງໄປສະນີ ບົນພື້ນຖານກົດໝາຍ ແລະ ລະບຽບການຂອງແຕ່ລະປະເທດ ແລະ ບົດບັນທຶກຄວາມເຂົ້າໃຈ, ໃຫ້ມີຄວາມສະເໝີພາບ ແລະ ຜົນປະໂຫຍດຮ່ວມກັນ. ທັງສອງຝ່າຍຈະສົ່ງເສີມການພັດທະນາຄວາມຮ່ວມມື, ການແລກປ່ຽນບົດຮຽນ ແລະ ຄວາມຊ່ວຍເຫຼືອທາງດ້ານທຸລະກິດໄປສະນີ, ການຄົ້ນຄວ້າວິໄຈ ແລະ ການສຶກສາ; 2) ຂອບ​ເຂດ​ການ​ຮ່ວມ​ມື, ເນື່ອງຈາກວ່າການບໍລິການໄປສະນີ ມີ​ການ​ປ່ຽນ​ແປງ​ໄວແນວໂນ້ມໃໝ່ຂອງຕະຫຼາດ ແລະ ຄວາມຕ້ອງການຂອງລູກຄ້າ ທັງສອງຝ່າຍຈຶ່ງໄດ້ຕົກລົງກັນ ດັ່ງນີ້: (1) ການ​ພັດ​ທະ​ນາ​ທຸ​ລະ​ກິດ​ໄປສະນີ ສອງຝ່າຍເປັນຕົ້ນແມ່ນໄປສະນີພັນ, ພັດສະດຸພັນ EMS​, E​-packet ​ ເພື່ອຮອງຮັບການຄ້າເອເລັກໂຕຣນິກ ແລະ ໂລຊິດຕິກໄປສະນີ ເພື່ອຕອບສະຫນອງແນວໂນ້ມໃໝ່ ແລະ ຄວາມຕ້ອງການຂອງລູກຄ້າ; (2) ຮ່ວມ​ມື​ພັດ​ທະ​ນາ​ການ​ບໍ​ລິ​ການ​ໄປ​ສະ​ນີ ທາງພາກພື້ນ​ໂດຍຜ່ານຊາຍແດນ​ຫວຽດ​ນາມ - ລາວ ໃຫ້ສອດຄ່ອງຕາມລະ​ບຽບ​ການ​ຂອງ UPU, ອາ​ຊຽນ​ກ່ຽວກັບການຄ້າດຳເນີນງານທາງໄປສະນີ, ການສົ່ງ EDI ແລະ ການຊຳລະເງິນລະຫວ່າງປະເທດ; (3) ສົ່ງເສີມການ​ຮ່ວມ​ມື​ສອງຝ່າຍ ໃນການບໍລິການທາງການເງິນໄປສະນີ, ການບໍລິການສະແຕມໄປສະນີ; (4) ສຶກສາ ແລະ ຮ່ວມມືເພື່ອສົ່ງເສີມການຫັນເປັນດິຈິຕອນໃນຂົງເຂດໄປສະນີ ແລະ (5) ການຮ່ວມມືໃນການຝຶກອົບຮົມໃຫ້ກັບພະນັກງານ ແລະ ແລກປ່ຽນບົດຮຽນ.

         ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ ສປປ ລາວ ໄດ້ກ່າວສະແດງຄວາມປິຕິຊົມຊື່ນທີ່ໄດ້ພົບປະກັບ ທ່ານ  ຫງວຽນ ແມ້ງ ຮຸ່ງ, ລັດຖະມົນຕີ​ກະຊວງ​ຖະ​ແຫຼ​ງຂ່າວ ​ແລະ ການສື່ສານ ສ.ສ ຫວຽດນາມ. ພ້ອມນັ້ນ, ທ່ານ  ຫງວຽນ ແມ້ງ ຮຸ່ງ ໄດ້ກ່າວ​ສະ​ແດງ​ຄວາມ​ຮັກ​ແພງ ​ແລະ ​ເຊື່ອ​ໝັ້ນ​ວ່າ ກະຊວງ​ຖະ​ແຫຼ​ງຂ່າວ ​ແລະ ການສື່ສານ ສ.ສ ຫວຽດນາມ ຈະ​ສືບ​ຕໍ່ໃຫ້ການ​ຮ່ວມມື ​ແລະ ຊ່ວຍເຫຼືອ​ໃຫ້​ກະຊວງ​ເຕັກ​ໂນ​ໂລ​ຊີ ​ແລະ ການສື່ສານ ສປປ ລາວ ໃນການພັດທະນາຂະແໜງການໄປສະນີ.

ພາບ ແລະ ຂ່າວ: ກົມໄປສະນີ.

 

ຊົມເຊີຍວັນໂທລະຄົມມະນາຄົມ 157 ປີ
ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2021
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບຫຼ້າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ