ປຶກສາຫາລືປະກອບຄຳຄິດເຫັນໃສ່ ຮ່າງກົດໝາຍ ວ່າດ້ວຍທຸລະກຳທາງເອເລັກໂຕຣນິກ ສະບັບປັງປຸງ

01/07/2022

ປຶກສາຫາລືປະກອບຄຳຄິດເຫັນໃສ່ ຮ່າງກົດໝາຍ ວ່າດ້ວຍທຸລະກຳທາງເອເລັກໂຕຣນິກ ສະບັບປັງປຸງ

       ໃນວັນທີ 29 ມິຖຸນາ 2022, ກົມເຕັກໂນໂລຊີດິຈິຕ໋ອນ, ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມປຶກສາຫາລືປະກອບຄຳຄິດເຫັນໃສ່ ຮ່າງກົດໝາຍ ວ່າດ້ວຍທຸລະກຳທາງເອເລັກໂຕຣນິກ (ສະບັບປັບປຸງ) ໂດຍການເປັນປະທານຂອງ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີຄະນະຮັບຜິດຊອບຮ່າງກົດໝາຍ, ມີຜູ້ຕາງໜ້າຈາກຫ້ອງການ, ກົມ, ສູນ, ສະພາແຫ່ງຊາດ, ກະຊວງຍຸດຕິທຳ ພ້ອມດ້ວຍບັນດາພະແນກທີ່ກ່ຽວຂ້ອງເຂົ້າຮ່ວມທັງໝົດ 30 ກວ່າທ່ານ.

   ຈຸດປະສົງຂອງກອງປະຊຸມໃນຄັ້ງນີ້ ກໍແມ່ນເພື່ອໃຫ້ບັນດາຜູ້ເຂົ້າຮ່ວມໄດ້ຄົ້ນຄວ້າ, ປຶກສາຫາລືປະກອບຄຳຄິດຄຳເຫັນ ໃສ່ຮ່າງກົດໝາຍວ່າດ້ວຍທຸລະກຳທາງເອເລັກໂຕຣນິກ (ສະບັບປັບປຸງ) ເພື່ອເຮັດໃຫ້ເນື້ອໃນຂອງຮ່າງກົດໝາຍມີຄວາມຮັດກຸມ, ຄົບຖ້ວນ, ຊັດເຈນ ສາມາດເປັນເຄື່ອງມືໃຫ້ການຄຸ້ມຄອງລັດ ມີປະສິດທິພາບ. ຊຶ່ງກົດໝາຍວ່າດ້ວຍທຸລະກຳທາງເອເລັກໂຕຣນິກ ໄດ້ຖືກຮັບຮອງຈາກກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ VII ແລະ ທ່ານປະທານປະເທດ ແຫ່ງ ສປປ ລາວ ໄດ້ປະກາດນໍາໃຊ້ໃນວັນທີ 17 ມັງກອນ 2013. ກົດໝາຍສະບັບດັ່ງກ່າວ ຖືວ່າເປັນນິຕິກຳທີ່ຮັບຮອງຂັ້ນພື້ນຖານຕໍ່ກັບ ການເຮັດທຸລະກຳ ຫຼື ການເຮັດຂໍ້ຕົກລົງ ຫຼື ສັນຍາ ໃນຮູບແບບເອເລັກໂຕຣນິກ ຫຼື ທາງອອນໄລ໌ ໂດຍມີພື້ນຖານມາຈາກກົດໝາຍສາກົນຂອງສະຫະປະຊາຊາດ (UNCITAL Model Law) ກ່ຽວກັບການຄ້າທາງເອເລັກໂຕຣນິກ ແລະ ລາຍເຊັນເອເລັກໂຕຣນິກ.

        ຜ່ານການຈັດຕັ້ງປະຕິບັດກົດໝາຍດັ່ງກ່າວ ມາເຖິງປະຈຸບັນ ຊຶ່ງເປັນເວລາເກືອບຮອດ 10 ປີ ເຫັນໄດ້ວ່າ ບົດບັນຍັດ ຫຼື ກົດລະບຽບບາງຢ່າງທີ່ໄດ້ກຳນົດໄວ້ໃນກົດໝາຍ ແມ່ນລ້າສະໄໝ ແລະ ບໍ່ສອດຄ່ອງກັບສະພາບຄວາມເປັນຈິງ, ໂດຍສະເພາະ ຄວາມກ້າວໜ້າຂອງເຕັກໂນໂລຊີດິຈິຕອນໃນຍຸກປະຈຸບັນ ເຊັ່ນ: ການເຮັດທຸລະກຳຊັບສິນດິຈິຕອນ ທີ່ນຳໃຊ້ເຕັກໂນໂລຊີ ບລັອກເຊນ, ການເກັບຮັກສາຂໍ້ມູນໄວ້ໃນລະບົບຄຣາວ, ການເຮັດສັນຍາໃນຮູບແບບ Smart Contract ແລະ ບັນຫາອື່ນໆ. 

 

ຊົມເຊີຍວັນໂທລະຄົມມະນາຄົມ 157 ປີ
ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2021
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບຫຼ້າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ