ກອງປະຊຸມໃຫຍ່ໜ່ວຍຊາວໜຸ່ມກົມເຕັກໂນໂລຊີດິຈິຕ໋ອນ

28/09/2022

ກອງປະຊຸມໃຫຍ່ໜ່ວຍຊາວໜຸ່ມກົມເຕັກໂນໂລຊີດິຈິຕ໋ອນ

     ກອງປະຊຸມໃຫຍ່ໜ່ວຍຊາວໜຸ່ມ ກົມເຕັກໂນໂລຊີ ດິຈິຕ໋ອນ (ກຕດ), ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ໄຂຂຶ້ນຢ່າງເປັນທາງການ ໃນວັນທີ 26 ກັນຍາ 2022 ນີ້, ທີ່ຫ້ອງປະຊຸມໃຫຍ່ (ຕຶກ F), ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໂດຍການເຂົ້າຮ່ວມຂອງສະຫາຍ ແກ້ວນະຄອນ ໄຊສຸລຽນ, ເລຂາໜ່ວຍພັກ ກຕດ, ສະຫາຍ ພວງປະເສີດ ແກ້ວສຸວັນ, ຄະນະພັກກະຊວງ, ກໍາມະການຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ກະຊວງເຕັກໂນໂລຊີ ແລະ ການສື່ສານ ແລະ ຕາງໜ້າຈາກສະຫະພັນແມ່ຍິງ ກຕດ, ຕາງໜ້າຈາກຄະນະກໍາມະບານ ກຕດ, ຕາງໜ້າຈາກຄະນະບໍລິຫານງານຊາວໜຸ່ມຂອງບັນດາ/ທຽບເທົ່າ ພ້ອມດ້ວຍບັນດາສະມາຊິກຊາວໜຸ່ມພາຍໃນ ກຕດ ເຂົ້າຮ່ວມຫຼາຍກວ່າ 60 ສະຫາຍ, ໃນນັ້ນ ມີຜູ້ແທນກອງປະຊຸມເຂົ້າຮ່ວມທັງໝົດ 42 ສະຫາຍ, ຍິງ 22 ສະຫາຍ.

      ກອງປະຊຸມໃຫຍ່ຄັ້ງນີ້ ໄດ້ຮັບຟັງການປະກອບຄຳຄິດຄຳເຫັນ ແລະ ເຫັນດີຮັບຮອງເອົາບົດລາຍງານການເມືອງ ຊຶ່ງໄດ້ສະຫຼຸບຕີລາຄາຜົນງານການເຄື່ອນໄຫວວຽກງານຂອງໜ່ວຍຊາວໜຸ່ມ ກຕດ ໃນໄລຍະຜ່ານມາ ແລະ ກໍານົດທິດທາງແຜນການໃນ 05 ປີຕໍ່ໜ້າ, ຮັບຮອງເອົາບົດສໍາຫຼວດການຊີ້ນໍາ - ນໍາພາຂອງຄະນະໜ່ວຍຊາວໜຸ່ມ ກຕດ ຊຸດເກົ່າ ເພື່ອເຮັດລ້ອນໜ້າທີ່ການເມືອງທີ່ພັກ - ລັດ ມອບໝາຍໃຫ້ໃນໄລຍະໃໝ່, ໜ່ວຍຊາວໜຸ່ມ ກຕດ ຕ້ອງອອກແຮງເພີ່ມທະວີວຽກງານກໍ່ສ້າງ ແລະ ປັບປຸງກັບວຽກງານຊາວໜຸ່ມໃຫ້ໜັກແໜ້ນເຂັ້ມແຂງຮອບດ້ານ, ຍົກສູງຄວາມສາມາດການຊີ້ນຳ-ນຳພາ ຂອງໜ່ວຍຊາວໜຸ່ມ ຊຶ່ງໄດ້ວາງມາດຕະການໃນການຈັດຕັ້ງປະຕິບັດ ດັ່ງນີ້: ຄະນະຊາວໜຸ່ມ ກຕດ ຕ້ອງໄດ້ເພີ່ມທະວີຄວາມເປັນເຈົ້າການ ຊີ້ນຳ-ນຳພາ, ຕິດຕາມ, ກວດກາ ແລະ ປະເມີນຜົນການຈັດຕັ້ງປະຕິບັດແຜນການ ຂັ້ນໜ່ວຍຂອງຕົນ ໃຫ້ສໍາເລັດຜົນ ແລະ ປະກົດຜົນເປັນຈິງ; ເພີ່ມທະວີຄວາມເອົາໃຈໃສ່ໃນການຮ່ວມຊີວິດການເມືອງ ແລະ ເຕົ້າໂຮມສະມາຊິກໃຫ້ເປັນປົກກະຕິ ເພື່ອເຜີຍແຜ່ແຜນການ ແລະ ໂຄງການ ຂອງກົມ ກໍຄື ແຜນການຂອງ ຄຊປປລ ກະຊວງເຕັກໂນໂລຊີ ແລະ ການສື່ສານ ແລະ ແຜນງານອັນລະອຽດຂອງ ຄະນະຊາວໜຸ່ມ ກຕດ ໃຫ້ສະມາຊິກຊາວໜຸ່ມໄດ້ຮັບຮູ້, ເຂົ້າໃຈ ແລະ ໃຫ້ສາມາດຫັນເປັນແຜນງານອັນລະອຽດຂອງໜ່ວຍໄດ້; ພ້ອມທັງດຳເນີນການກວດກາການຈັດຕັ້ງປະຕິບັດວຽກງານຢ່າງເປັນລະບົບ ໂດຍມີການສະຫຼຸບຖອດຖອນບົດຮຽນ ຕີລາຄາການປະຕິບັດວຽກງານເປັນແຕ່ລະໄລຍະ; ປັບປຸງກອງເລຂາປະຈຳໜ່ວຍຄືນໃໝ່ ເພື່ອຮັບປະກັນລະບອບລາຍງານໃຫ້ ຄຊປປລ ກຕສ ໃຫ້ທັນກັບສະພາບການ ແລະ ໃຫ້ດຳເນີນການເປັນປົກກະຕິ; ເອົາໃຈໃສ່ປະຕິບັດພັນທະໜ້າທີ່ຂອງຕົນຢ່າງເຕັມສ່ວນ ຕາມກົດລະບຽບຂອງ ຄະນະຊາວໜຸ່ມ ປະຊາຊົນ ປະຕິວັດລາວ ວາງອອກຢ່າງເຂັ້ມງວດ.

       ພ້ອມນີ້, ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍຊາວໜຸ່ມ ກຕດ ຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້ ຊຶ່ງມີຜູ້ລົງຮັບສະໝັກເລືອກຕັ້ງທັງໝົດ 07 ສະຫາຍ, ຍິງ 02 ສະຫາຍ ແລະ ເລືອກໄດ້ 05 ສະຫາຍ, ຍິງ 02 ສະຫາຍ. ກອງປະຊຸມຄັ້ງປະຖົມມະລຶກຄົບຄະນະ ຂອງ ຄະນະຊາວໜຸ່ມ ໜ່ວຍ ກຕດ ໄດ້ເລືອກຕັ້ງເອົາ ເລຂາ, ຮອງເລຂາ, ປະທານກວດກາ ແລະ ຄະນະ ດັ່ງນີ້: ສະຫາຍ ປະສິດທິເດດ ຫຼວງວິໄລ ເປັນເລຂາ, ສະຫາຍ ປີຊາ ອວນສີສົມພູ ເປັນຮອງເລຂາ, ສະຫາຍ ມາລາຈິດ ສີລະຈິດ  ປະທານກວດກາ, ສະຫາຍ ນາງ ດາລີວັນ ມາລາວົງ ແລະ ສະຫາຍ ນາງ ສີຈັນ ພັນທະລາ ເປັນຄະນະ. ພ້ອມດຽວກັນນີ້, ໄດ້ມີພິທີປະກາດ 4 ບຸກ ແລະ ມອບໃບຢັ້ງຢືນ 4 ບຸກ ປະຈໍາປີ 2020 ໃຫ້ກັບໜ່ວຍຊາວໜຸ່ມ ກຕດ ແລະ ມອບໃບຢັ້ງຢືນ 4 ບຸກ ປະຈໍາປີ 2020 ພ້ອມດ້ວຍທຸງໄຊ ໃຫ້ກັບໜ່ວຍຊາວໜຸ່ມກົມ ເຕັກໂນໂລຊີການສື່ສານຂໍ້ມູນຂ່າວສານ (ກົມໄອຊີທີ), (ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໃນເມື່ອກ່ອນ)

       ພາບ+ຂ່າວ: ພະແນກປະຊາສໍາພັນ, ຫ້ອງການກະຊວງ.

 

ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2021
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ2 (2016-2020) ສະບັບຫຼ້າສຸດ
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ